ВО ЖИВО | Локални избори во Македонија
Граѓаните на Македонија денеска гласаат на осмите локални избори. Ќе се гласа на 3.480 избирачки места за 309 кандидати за градоначалници и 576 кандидатски листи за советници, или за вкупно 10.490 кандидати.
Препорачано
ОД МИНУТА ВО МИНУТА
За Советнички листи ВМРО-ДПМНЕ освоила 301.000 гласови, СДСМ 125.000, НАИ 114.000, Вреди 92.000, Левица 58.000
Владејачката ВМРО-ДПМНЕ на вчерашните локални избори освои најголем број гласови и за советнички листи на ниво на целата држава. Според податоците на Државната изборна комисија, втора е СДСМ.
Димитриевски во втор круг за нов мандат: Имам гласови колку сите шест кандидати заедно
Актуелниот градоначалник на Куманово од редовите на ЗНАМ, Максим Димитриевски во вториот изборен круг ќе се бори за нов мандат. Според податоците објавени на веб-страницата на Државната изборна комисија, Димитриевски освоил 37,89 отсто од гласовите или 16.183 гласа, додека втор е независниот Горан Стојковски со 13,92 проценти од гласовите, односно 5.946 гласови.
Втор круг ќе има во четири скопски општини и за градоначалник на Град Скопје
На вчерашното гласање во првиот круг од локалните избори, според првичните неофицијални резултати, избрани се градоначалници во неколку општини во земјата. Во десетте скопски општини, некои градоначалници се веќе познати, додека во други ќе има втор круг на 2 ноември.
ВМРО-ДПМНЕ во првиот круг добива 32 градоначалници, СДСМ тројца, Вреди пет, а НАИ четири
Градоначалник во првиот круг на вчерашните локални избори е избран во 44 општини, а според првичните неофицијални резултати најголем дел од нив се кандидатите на владејачката ВМРО-ДПМНЕ
Орце Ѓорѓиевски и Амар Мециновиќ во втор круг ќе се борат за Скопје
Кандидатот на ВМРО-ДПМНЕ Орце Ѓорѓиевски како првопласиран, со добиени 39,43 проценти од гласовите и кандидатот на Левица Амар Мециновиќ кој освои 13,20 проценти одат во вториот круг за избор на градоначалник на Скопје.
ВИДЕО | Апасиев: Левица станува лидер на опозицијата во Македонија
Левица станува лидер на опозицијата во Македонија, рече вечерва претседателот на партијата Димитар Апасиев. Тој соопшти дека кандидатот за градоначалник на Скопје Амар Мециновиќ влегува во трката во вториот круг и соопшти дека Левица добила над 70 советници.
ВИДЕО | Половина час по полноќ – ДИК ги објави неофицијалните резултати од локалните избори
По завршувањето на гласањето на локалните избори, Државната изборна комисија одржа прес-конференција на која ги соопшти неофицијалните резултати од изборниот процес.
ВО ЖИВО - Прес-конференција на ДИК
Левица: Амар Мециновиќ сигурно влегува во вториот круг за градоначалник на Скопје
Портпаролот на Левица, Круме Богевски, на денешната прес-конференција изјави дека, според досегашните резултати, кандидатот за градоначалник на Скопје од Левица, Амар Мециновиќ, речиси сигурно ќе влезе во вториот изборен круг.
Мицкоски: Имаме победа во 30 општини, а ова е порака за ДУИ
Лидерот на ВМРО-ДПМНЕ и премиер на Македонија, Христијан Мицкоски, вечерва на партискиот собир по изборите изјави дека партијата остварила убедлива победа на локалните избори.
Коњановски од ВМРО-ДПМНЕ прогласи апсолутна победа во Битола
Кандидатот за градоначалник и актуелен градоначалник на Битола, Тони Коњановски, вечерва објави дека неговиот тим остварил убедлива победа и на изборите за градоначалник и за Совет на општината.
Касами од Вреди прогласи победа во Тетово: Ајде на плоштад!
Кандидатот за градоначалник на Тетово од редовите на Вреди, Биљал Касами, им се заблагодари јавно на граѓаните на Тетово за, како што рече, големата победа на изборите за втор мандат како градоначаник.
Петар Јанков од ВМРО-ДПМНЕ прогласи победа во Струмица
Кандидатот за градоначалник на Струмица од ВМРО-ДПМНЕ и коалицијата, Петар Јанков, вечерва прогласи победа.
Бујар Османи го призна поразот во Чаир: Честитки за Меџити и за коалицијата што победи
Кандидатот за градоначалник на Чаир од редовите на ДУИ, Бујар Османи, преку објава на Фејсбук му честита на својот противкандидат Изет Меџити од Вреди за победата на локалните избори и му посака успех во водењето на општината во наредните четири години.
Митко Јанчев од ВМРО-ДПМНЕ објави победа во Кавадарци уште во првиот круг
Кандидатот за градоначалник на општина Кавадарци од редовите на ВМРО-ДПМНЕ, Митко Јанчев, објави победа уште во првиот круг.
Јакимовски: „Пата-пата“ во Карпош, одиме во втор круг
Актуелниот градоначалник на Општина Карпош, Стевчо Јакимовски, потврди дека и овојпат ќе влезе во изборна трка за вториот круг на локалните избори на 2 ноември, каде што ќе се соочи со кандидатот на ВМРО-ДПМНЕ, Сотир Лукровски.
Левица: Амар Мециновиќ влегува во втор круг за градоначалник на Скопје
Сѐ поизвесно станува дека кандидатот за градоначалник на Скопје од редовите на Левица, Амар Мециновиќ, влегува во вториот круг и исклучително сме задоволни од резултатите, истакна на прес-конференција портпаролот на Левица Круме Богевски.
Мисајловски: Разликата е 3:1, во некои општини и 10:1 во корист на ВМРО-ДПМНЕ
Потпретседателот на ВМРО-ДПМНЕ, Владо Мисајловски, изјави дека очекува неговата партија да обезбеди голема победа уште во првиот круг од локалните избори.
Грозданов од ВМРО-ДПМНЕ води во Кочани со над 40 отсто од гласовите
Според моменталните резултати од Државната изборна комисија, кандидатот поодржан од коалицијата „Твоја Македонија“ формирана од ВМРО-ДПМНЕ, Влатко Грозданов, е во водство во Општина Кочани со освоени 40,73 отсто од гласовите, односно 1.861 глас.
Првични резултати на ДИК: ВМРО-ДПМНЕ води во 52 општини, ВРЕДИ во 9, СДСМ во 7
Државната изборна комисија (ДИК) на својата веб-страница почна да ги објавува резултатите од првиот круг на Локалните избори 2025.
СДСМ очекува победа во седум општини
СДСМ води и очекува победа во Центар, Крива Паланка, Пробиштип, Чучер Сандево, Чешиново Облешево, Кривогаштани и Богданци. Тесен е резултатот во Валандово, Македонска Каменица, Неготино, Ранковце и Лозово, додека за Дојран се надеваат дека ќе одат во втор круг, објави генералниот секретар и шеф на Изборниот штаб на партијата, Александар Саша Димитриевиќ.
ВИДЕО | „ДУИ падна таму каде што мислеше дека е најсилна“ – Меџити прогласи триумф на Вреди
Таму каде што од ДУИ мислеа дека се најсилни, токму таму се соочија со недоверба од граѓаните. Вака кандидатот за градоначалник на Чаир од редовите на Вреди, Изет Меџити, ја започна вечерашната прес-конференција по завршувањето на гласањето.
Во Општина Центар Жупа не е обезбеден потребниот цензус
Во Општина Центар Жупа не е обезбеден потребниот цензус од 1/3 од вкупното гласачко тело кое изнесува 7551 лице, потврди за МИА, Неџип Илјаз, претседател на Општинската изборна комисија.
Јавното обвинителство открива случаи на поткуп, притисоци и изборни прекршоци низ државата
Претседателот на привремената Комисија на Јавното обвинителство за следење на постапувањето по евентуални кривични дела поврзани со изборите, јавниот обвинител Џељаљ Бајрами, изјави дека низ денот обвинителствата внимателно го следеле текот на изборниот процес и дека само неколку случаи укажуваат на можни кривични дела.
ВИДЕО | Вреди слави во Скопје – небото осветлено со огномети
На плоштадот „Скендербег“ во центарот на Скопје вечерва владее славеничка атмосфера.
Тошковски: Изборите беа едни од најмирните и најбезбедните во поновата историја на државата
Министерот за внатрешни работи Панче Тошковски оцени дека денешните избори биле едни од најмирните и најбезбедните во поновата историја на државата без ниту еден посериозен инцидент или нарушување на јавниот ред и мир.
ВМРО-ДПМНЕ објави победнички бројки – победа во прв круг во Охрид, Радовиш, Ресен и во Свети Николе
ВМРО-ДПМНЕ објави неофицијални изборни резултати според кои партијата бележи убедливо водство во повеќе општини низ државата. Според бројките што ги соопштија од штабот, разликата во гласови во повеќето места е значителна.
Богевски: Кандидати на Левица добивале понуди за гласови во замена за 2.000 евра
Портпаролот на Левица, Круме Богевски, посочи дека набљудувачи на Левица не биле пуштани на избирачките места, а на нивните семејства им бил вршен притисок, што партијата го смета за сериозно кршење на демократските стандарди и изборниот молк.
ВИДЕО | Песни, аплаузи и еуфорија во партиските штабови
Возбудлива изборна ноќ во Скопје – песни, аплаузи и возбуда во штабовите на ВМРО-ДПМНЕ, Вреди и СДСМ, додека партиите ги очекуваат првите резултати.
ВО ЖИВО: Прес-конференција на ДИК во 19.30 часот
ИЗЛЕЗНОСТ ДО 18:30 ЧАСОТ
На денешната прес-конференција на Државната изборна комисија (ДИК) беше соопштено дека до 18:30 часот своето право на глас го искористиле 803.091 граѓанин, што претставува излезност од 46,65 проценти.
Ѓорѓиевски: Денес е празник на демократијата, гласот на секој граѓанин има сила да ја обликува иднината
Денес е празник на демократијата, ден кога гласот на секој граѓанин има сила да ја обликува иднината, порача кандидатот за градоначалник на Скопје, Орце Ѓорѓиевски.
Меџити: Секој глас е вреден, а секој граѓанин има одговорност да учествува во одлучувањето
Првиот заменик-претседател на Владата и министер за животна средина и просторно планирање и кандидат за градоначалник на општина Чаир, Изет Меџити по гласањето изјави дека тоа е граѓанска обврска и најдобар начин да се покаже грижа за иднината на нашата земја.
Жител на Чашка осомничен за изборен поткуп – полицијата пронашла 2.000 евра кај него дома
Во дом на жител од село во општина Чашка биле пронајдени 60 банкноти од по 2.000 денари, поради што е осомничен за изборен поткуп, соопшти Министерството за внатрешни работи.
Османи: Празник на демократија
Кандидатот на ДУИ за градоначалник на Чаир, Бујар Османи, по гласањето на локалните избори се огласи со порака дека денес е празник на демократијата.
Избирачките места затворени, почнува пребројувањето на гласовите
Гласачките места беа отворени во 7 часот. Право на глас имаа 1 832 415 лица запишани во Избирачки список. Тие на 3474 избирачки места во земјата можеа да се изјаснат за 309 кандидати за градоначалници и 576 кандидатски листи за членови на општинските совети или за вкупно 10 490 кандидати.
Секој глас е придонес за иднината на општеството, порача Тошковски
Министерот за внатрешни работи Панче Тошковски по гласањето порача дека демократијата се гради преку учество, доверба и почит кон волјата на граѓаните.
Амар Мециновиќ го даде својот глас: „Во интерес на Скопје и цела Македонија!“
„Ве повикувам сите да излезете и да го остварите своето демократско право – во интерес на Скопје, сите наши скопски општини, како и на цела Македонија!“ – повика Амар Мециновиќ, кандидат за градоначалник на Скопје од редовите на Левица.
Шукова: Секој глас е чекор напред кон подобро Скопје
Денеска е значаен ден за Скопје. Јас го остварив своето право на глас и ги повикувам сите граѓани да го сторат истото, затоа што така заеднички придонесуваме за подобра иднина на нашиот град, изјави кандидатката за градоначалник на Град Скопје од редовите на СДСМ, Каја Шукова.
Сиљановска Давкова: Очекувам долгогодишната традиција на пристојни, фер и демократски избори да продолжи
Претседателката Гордана Сиљановска Давкова, денеска го оствари своето право на глас во рамките на Локалните избори и ги охрабри граѓаните да го направат истото.
Филипче: Граѓаните ќе одлучат според објективни параметри
Очекувам мирен ден, посакувам мирни и фер избори, изјави лидерот на СДСМ Венко Филипче по гласањето на локалните избори.
Мицкоски: Очекуваме уште една историска победа
Според информациите со кои располагам, изборниот ден тече мирно и достоинствено, како што и се очекува, изјави премиерот и лидер на политичката партија ВМРО-ДПМНЕ, Христијан Мицкоски по денешното гласање на локалните избори.
Во кои општини постои опасност изборите да не успеат од прва?
Според најновите податоци на Државната изборна комисија за излезноста до 17 часот, во неколку општини е забележан исклучително низок одѕив на гласачите, што отвора можност во нив да не биде избран градоначалник.
ВИДЕО | Починати граѓани се во Избирачкиот список – трауми за нивните семејства
Во повеќе наврати на социјалните мрежи и преку медиумите, граѓани алармираат дека починати членови на нивните семејства се во Избирачкиот список за денешното гласање на локалните избори. Дел од нив се децидни дека кога биле да гласаат и кога во списокот на гласачи го виделе своето име, под нив биле и нивни починати родители кои ги виделе со слика, име и презиме. Вакви трауматични искуства и вознемиреност на социјалните мрежи искажаа и новинари кои што виделе свои блиски кои се починати во 2021 година дека фигурираат на избирачкиот список.
Приведени се двајца престапници во Чаир — лажно се претставувале како изборни набљудувачи
Двајца престапници се приведени денеска во двор на основно училиште на подрачјето на Чаир во Скопје поради непочитување наредба на овластени службени лица и утврдување на нивниот идентитет.
АВМУ поведе постапки против ТВ 21-М и ТВ Шутел за прекршување на изборниот молк
Агенцијата за аудио и аудиовизуелни медиумски услуги (АВМУ) поведе прекршочни постапки против ТВ Компани 21-М и ТВ Шутел поради прекршување на изборниот молк во првиот круг од локалните избори 2025 година.
Излезност до 17 часот
Според последмните информации коишто се пристигнати во Државната изборна комисија (ДИК), излезноста на локалните избори до 17 часот изнесува 39,61 отсто.
ВО ЖИВО: Прес-конференција на ДИК
Вклучување во живо од прес - конференцијата на ДИК во 17 часот
Врапчиште со 14,94 отсто е со најслаб одзив на гласачите до 15 часот
Во општините со мнозинско албанско население е понизок одзивот на гласачите во споредба со општините со мнозинско македонско население, според податоците на Државната изборна комисија за излезноста на избирачите до 15 часот.
Скопјани гласаат во ист број како на претходните локални избори
Излезноста во повеќето скопски општини до 13 часот е значително пониска од онаа забележана на локалните избори во 2017 година, но речиси идентична со излезноста од 2021 година, покажуваат податоците на Државната изборна комисија.
Скандал во Центар – независните без лого на ливчето, бараат поништување на изборите
Независната листа во Општина Центар поднела приговор до Државната изборна комисија (ДИК), поради тоа што нивното лого не било отпечатено на гласачкото ливче. Како што наведуваат, ваквиот пропуст направил сериозна повреда на Изборниот законик, конкретно на членовите 97 став 1 и 98 став 1.
Уапсен член на избирачки одбор во Чаир – полицијата го привела додека пушел цигара на пауза
Претседателот на избирачкиот одбор на ова избирачко место изјавил дека сѐ уште нема официјални информации за причините за апсењето, додека изборниот процес продолжил нормално.
Гласањето на пауза, додека новинарка да направи фотографии?!
На избирачкото место 2648 во Влае, општина Карпош, новинарката на Мета.мк, Антонија Јаневска, била спречена да фотографира за потребите на медиумот, со образложение дека немала акредитација издадена од ДИК.
Излезност до 15 часот
До 15 часот излезноста на Локалните избори е 31,16 проценти. Како што кажаа на прес-конференцијата на Државната изборна комисија добиени се податоци од 91,16 проценти од избирачки места и досега гласале 515,069 граѓани.
ЗНМ: Да се обезбеди почитување и непречена работа на медиумските работници на гласачките места
Здружението на новинарите на Македонија (ЗНМ) апелира до Државната изборна комисија (ДИК), општинските изборни комисии и Министерството за внатрешни работи да продолжат да обезбедуваат непречен пристап и услови за работа за новинарите и медиумските работници на сите избирачки места. Професионалното, навремено и точно информирање на јавноста за текот на изборниот процес, како што велат, е од суштинско значење за довербата во изборите.
ВО ЖИВО: Прес-конференција на ДИК
Вклучување во живо од прес - конференцијата на ДИК во 15 часот
Паднаа првите поткупувачи - во Прилеп приведени две лица од Крушево
Две лица се приведени, а петмина се повикани на разговор во полиција поради поткуп при гласање.
Најголема излезност во општина Чашка со 40,74 отсто
До 13 часот, најголема излезеност има во Богданци 27,31 отсто, Вевчани 33,76, Градско 26,01, Дебарца 28,42, Демир Капија 29,25, Дојран 30,74, Кратово 30,01, Крива палнка 32,42, Лозово 31,86, Новаци 36,52, Ранковци 32,07 и Чашка 40,74 отсто, додека најмала излезеност е регистрирана во Босилово 12,96 отсто, Врапчиште 7,23, Гази Баба 18,97, Гостивар 11,66, Дебар 13,87, Желино 17,19, Јегуновце 17,50, Маворово и Ростуше 14,45, Пласница 18,88, Радовиш 17.97, Струга 16 и Шуто Оризари 13,76 проценти
ОДИХР: Не е важен само изборниот ден, туку и предизборните процеси, како и тие по изборите
Шефот на Мисијата за набљудување на изборите на ОДИХР за локалните избори во земјава Матео Мекачи денеска изјави дека набљудувачите ги следат сите аспекти поврзани со изборите и истакна дека не е битен само денот на изборите, туку и предизборните процеси, како и процесите по самиот ден на изборите.
Погрешно испечатени гласачки ливчиња во Ново Село, наводи за изборен поткуп во Велес, Прилеп, Крива Паланка и Свети Николе
Јавното обвинителство соопшти дека гласањето досега тече без поголеми нарушувања на изборниот процес.
ИЗЛЕЗНОСТ ДО 13 ЧАСОТ
Државната изборна комисија (ДИК) соопшти дека до 13 часот, пристигнати се податоци од 3.207 избирачки места. На овие избирачки места гласале 335.244 граѓани, односно 20,12 проценти.
ВО ЖИВО: Прес-конференција на ДИК
Излезност до 13 часот
Ниска излезност во Кочани во споредба со ланските парламентарни избори
До 11 часот на денешните Локални избори, своето избирачко право во Кочани го оствариле 3.215 граѓани од вкупно 32.446 запишани избирачи, што претставува излезеност од 9,91 отсто.
Според податоците на Општинската изборна комисија, ова е за 1.585 гласачи помалку во споредба со излезеноста во истото време на минатогодишните Парламентарни избори.
До 11 часот излезноста помала отколку на „пандемиските“ избори во 2021 година
Иако изборите во 2021 година се одржаа под специфични услови поради пандемијата на ковид, тогашната излезност до 11 часот беше повисока од денешната.
До 11 часот најголема излезност има во Чашка, Новаци и Пробиштип
Според податоците на ДИК, општини со најголема излезеност се Чашка 22,60 проценти, Новаци 19,3, Пробиштип, 17,64, Крушево 16,97, Крива Паланка 16, 85, Кратово 16,16, Вевчани 16,02, Дебрца 15,76, Градско 15, 27, Ранковци, 15,5, Демир Капија, 15, Богданци, 14,55, Берово 13,51, Гевгелија, 12,81, Виница, 10,76, Бутел 10 проценти.
Со најмала излезеност се општините Врапчиште, 2,54 проценти, Сопиште, 3,93 проценти, Боговиње, 4,48 проценти и Центар Жупа, 4,89 проценти.
ИЗЛЕЗНОСТ ДО 11 ЧАСОТ
Државната изборна комисија (ДИК) соопшти дека до 11:15 часот, пристигнати се податоци од 3.139 избирачки места. На овие избирачки места гласале 154.275 граѓани, односно 9,38 проценти.
ВО ЖИВО: Прес-конференција на ДИК
Одбиената тужбата против ДИК: Гласовите за листата со починато лице во Скопје ќе бидат поништени
Управниот суд ја одби тужбата на политичка партија, која поднесе тужба против одлуката на Државната изборна комисија да ја поништи нивната листа за Совет на Град Скопје поради тоа што на неа се најде починато лице, со што одлуката на ДИК останува во сила.
Дваесет пријави за прекршување на изборниот молк
Дополнително, биле евидентирани и 47 објави на социјалните мрежи со содржини кои повикуваат на гласање за одредени кандидати, како и видеа и фотографии од партиски активности во изборни штабови, што претставува прекршување на изборниот молк.
До 9 часот најголема излезност во Пробиштип - 6,64 отсто
Според обработените податоци, на ДИК, најголема излезност има во Пробиштип - 6,64 отсто, а најмала во Врапчиште 0,87 проценти.
Во Битола излезноста е 3,38 проценти, Богданци 4,68 проценти, Боговиње 1,29, Бутел 3,63, Вевчани 5,2, Гевгелија, 4,37, Гостивар 1,71, Градско 5,61, Делчево, 4,11, Демир Капија, 5,37, Дојран 5,06, Зеленикот 5,62, Карпош 3,09, Кисела Вода 3,65, Кичево, 2,35, Кратово, 5,13, Куманово 1,91, Липково, 2,02, Лозово 6,36, Ново Село 5,5, Охрид 2,82, Прилеп, 3,41, Ресен 5,1, Сарај 2,46, Струмица, 3,92, Студеничани 1,85, Теарце 1,90, Тетово 2,08, Центар 2,84, Штип 3, Шуто Оризари 2,17.
Тошковски: Над 90 отсто од капацитетите на МВР ги обезбедуваат изборите
Над 90 проценти од капацитетите на Министерството за внатрешни работи се ангажирани за обезбедување на Локалните избори, со засилено присуство на терен, особено околу „жешките точки“ каде што се очекува поголема фреквенција на граѓани, соопшти министерот Панче Тошковски.
На две избирачки места гласањето се одвива без користeње на уредот за биометриска идентификација
Во Куманово на едно избирачко место, каде се запишани 12 гласачи, поради објективни околности, односно немање струја во тоа избирачко место, се гласа без уредот за биометриска идентификација. Иста ваква одлука е донесена за едно избирачко место во Штип, број 2271 каде што има запишано 507 гласачи.
Кондарко: Досега нема пријави за неправилности, гласањето тече непречено
Избирачките места се отворени навреме во 7 часот, согласно процедурите на ДИК и гласањето се одвива без никакви проблеми. Ние досега немаме пријави за какви било тешкотии за текот на гласањето - изјави претседателот на Државната изборна комисија, Борис Кондарко на денешната прес-конференција
ИЗЛЕЗНОСТ ДО 9 ЧАСОТ
Како што соопшти претседателот на ДИК, Борис Кондарко до 9:15, правото на глас го оствариле 41.890 граѓани
ВО ЖИВО: Прес-конференција на ДИК
Навреме отворени сите избирачки места
Навреме се отворени сите избирачки места и процесот на гласање за Локалните избори се спроведува без проблем, соопшти изутринава Државната изборна комисија (ДИК).
МВР презема мерки за мирен, фер и демократски изборен процес
Министерството за внатрешни работи апелира до сите граѓани и до политичките партии, да придонесат за мирна и демократска атмосфера, да ги почитуваат упатствата на полициските службеници и да се воздржат од било какви активности кои би можеле да го нарушат изборниот процес.
Полицијата ќе ги обезбедува гласачките места непрекинато почнувајќи од 6:00 часот до 19:00 часот за времетраењето на гласањето, по затворањето на гласачкото место и за време на сумирањето на резултатите и ќе ги отстранува сите неовластени лица од објектот.
Првичните резултати од локалните избори ДИК треба да ги соопшти во рок од 12 часа
Државната изборна комисија (ДИК) првичните резултати од локалните избори добиени по електронски пат од општинските изборни комисии ги објавува сукцесивно, а резултатите врз основа на податоците од записниците од општинските изборни комисии во рок од 12 часа по завршувањето на изборите
Бесплатна телефонска линија за пријавување повреди на избирачкото право на денот на локалните избори
Во канцеларијата на Народниoт правобранител во периодот од 7 до 19 часот ќе функционира беслатната телефонска линија: 0800-54321, на којашто граѓаните ќе можат да пријават каква било повреда на избирачкото право.
Лакмус за политичката моќ и најави на промените – Што ги карактеризираше досегашните локални избори
Карактеристично за речиси сите локални избори е тоа што многу често биле предвесници на политичките промени, како во реалниот живот, така и во Собранието.
Во Скопје гласаат 474.304 граѓани, ќе избираат помеѓу 16 кандидати за градоначалник и 19 листи за советници
Скопјани на Локалните избори 2025 имаат можност да избираат градоначалник на Град Скопје меѓу 16 кандидати, од кои само една жена. За 45 советнички места има поднесено 19 листи со 855 кандидати. Тие исто така гласаат и за градоначалници и за советници на скопските општини во кои живеат. Па, така, на изборните места ќе добијат четири ливчиња, кои по гласањето ќе треба да ги стават во обележани кутии.
Локалните избори ќе ги следат 1.451 домашни и странски набљудувачи
Државната изборна комисија акредитираше 807 домашни и 644 странски набљудувачи. Акредитирани за следење на изборите се и 12 странски новинари.
Гласачките кутии се отвораат во 7 часот
На изборите учествуваат 22 партии, 19 коалиции и 119 групи на избирачи, односно независни кандидатури.
Гласањето почнува во 7 часот и ќе трае до 19 часот. Ако гласањето биде прекинато подолго од еден час, тоа ќе биде продолжено за онолку време колку што траел прекинот, но не повеќе од три часа.
Почитуван читателу,
Нашиот пристап до веб содржините е бесплатен, затоа што веруваме во еднаквост при информирањето, без оглед дали некој може да плати или не. Затоа, за да продолжиме со нашата работа, бараме поддршка од нашата заедница на читатели со финансиско поддржување на Слободен печат. Станете член на Слободен печат за да ги помогнете капацитетите кои ќе ни овозможат долгорочна и квалитетна испорака на информации и ЗАЕДНО да обезбедиме слободен и независен глас кој ќе биде СЕКОГАШ НА СТРАНАТА НА НАРОДОТ.ПОДДРЖЕТЕ ГО СЛОБОДЕН ПЕЧАТ.СО ПОЧЕТНА СУМА ОД 100 ДЕНАРИ
Видео на денот