Никој не може точно да каже колку дрвја паднаа низ Скопје во текот на страшното невреме што се случи пред неколку денови кога ветрот со брзина од над 130 километри на час, носеше буквално сѐ пред себе – покриви, гранки, лимени огради и уриваше дрвја.

И четири дена по невремето во тревниците низ градот сѐ уште лежат паднатите стебла, затоа што јавните претпријатија и општинските комуналци со постојната механизација и луѓе, едноставно досега не постигнаа да ги расчистат сите.

Отстранувањето се спроведуваше по приоритет, најпрво требаше да се тргнат оние што ги блокираа улиците и сообраќајот за да се овозможи нормално функционирање на градот.

Првичната информација од МВР што следуваше набрзо откако невремето стивна, беше дека се пријавени 189 паднати дрвја, но бројката е веројатно и трипати поголема. Голем број дрвја паднаа во Градскиот парк, околу 80 на гробиштата „Бутел“, стотици низ Карпош и Аеродром како и низ другите општини, предизвикувајќи огромна материјална штета и оставајќи зад себе многу смачкани автомобили, но за среќа ураганот помина без човечки жртви.

Огромна дрвна маса остана по невремето во Скопје која се транспортира во непознат правец, барем за јавноста. Од Град Скопје објаснија за што ќе се намени.

ФОТОГАЛЕРИЈА | Брмчат пилите во Градски парк, се расчистуваат паднатите дрвја

Граѓаните со денови слушаат брмчење на пили со кои работниците ги сечат паднатите стебла и гранки, па ги товарат на камиончињата со кои располагаат. Дел од исечените трупци лежат во тревите и чекаат да бидат транспортирани.
Всушност, станува збор за тони и тони дрвна маса што се носи во непознат правец, барем за очите на јавноста.

За тоа што се прави потоа со овие дрвја, каде се носат, се користат ли за нешто и кои ги користи одговор побаравме од Град Скопје.

Оттаму објаснуваат дека по расчистувањето на теренот, паднатите листови, ситните гранки и останатиот растителен отпад се транспортираат до депонијата „Дрисла“, каде што соодветно се одложуваат.

Поголемите стебла и дрвната маса се пренесуваат во ЈП „Паркови и зеленило“, каде што се складираат и се подготвуваат за понатамошна намена. Планирано е од нив да се изработуваат летниковци за на Водно, урбана опрема, клупи, огради и слично – велат од Град Скопје.

Дел од урнатите стебла, како што тврдат, ќе завршат за огрев.

Според воспоставената практика, останатата дрвна маса ќе им биде доделена на социјално ранливи категории граѓани, кои ќе можат да ја искористат како огревно дрво, во соработка со Црвениот крст и со невладината хуманитарна организација „Св. Спас“. Со ова, покрај расчистувањето на последиците од невремето, дрвната маса добива корисна намена и претставува поддршка за семејствата на кои им е најпотребна – посочуваат од Градот.

Сè уште не се знае на кој начин ќе се исплаќаат штети за разурнатите гробови

Хаосот што се случи во Скопје ги размрда институциите и локалните власти, кои деновиве ги повикуваа граѓаните да пријавуваат штети од невремето објавувајќи телефонски броеви за таа намена. Сепак, по социјалните мрежи и по неколку денови оттогаш можат да се прочитаат апели на граѓаните што бараат помош за да се отстранат дрвја што останале при паѓањето потпрени на балкони и згради или да се отстранат остатоци од лимови што уште висат од покривите и од дрвјата и се опасни за безбедноста на минувачите.

Неизвесно е и каква е состојбата на дрвјата што го издржаа ударот на силниот ветар, дали се стабилни или не, особено оние што се стари со децении. Можеби затоа  ЈП „Паркови и зеленило“ апелираше до граѓаните да не ги паркираат возилата под дрвја и да избегнуваат задржување во близина на висока вегетација, откако УХМР најави нестабилно време, проследено со пороен дожд, грмежи и засилен ветер, но не и невреме.

Во Градски парк, пак, веќе започна акција за садење 60 нови садници јавор и јасен откако во невремето паркот загуби голем број стари дрвја.

 И ова е само почеток! Градскиот парк ќе го облагородиме со уште повеќе дрвја, зеленило и нови содржини. На местото на секое паднато дрво ќе никне нова надеж, а паркот повторно ќе биде уште позелен, поубав и подостоен за скопјани. Паралелно, нашите екипи продолжуваат со санирање на штетите низ целиот град – информира Ѓорѓиевски.