Шведските сопственици на репликата на викиншкиот брод „Глад ав Гилберга“ (Glad av Gillberga), кој се појавува во филмот „Одисеја“ (The Odyssey), тврдат дека студиото „Јуниверзал“ не ги покрило трошоците за неговата поправка, иако, според нив, претходно било договорено тоа да го направи, пишува „Гардијан“.

Бродот, кој е реплика на викиншки воен брод од околу 1040 година, пронајден во данскиот фјорд Роскилде, поминал шест месеци во продукцијата на филмот на Кристофер Нолан. Според сопствениците, по враќањето бил оштетен, меѓу другото на крмата и јарболот.

Непрофитната организација „Викингаледен“, која управува со викиншки центар во западна Шведска, соопшти дека до „Јуниверзал“ испратила фактура од околу 5.100 евра за материјалите потребни за поправката, без да ја наплати доброволната работа на своите членови. Но, тврдат дека парите никогаш не пристигнале.

„Наплативме само за материјалите, а не и за трудот. Секако дека ‘Јуниверзал’ може да си дозволи да ги плати тие 5.100 евра. Се чувствуваме заборавени“, изјави претседателот на здружението, Петер Олаусон.

@svtnyheter Vikingaskeppet Glad av Gillberga hyrdes ut till nya storfilmen The Odyssey – men filmbolaget Universal har ännu inte betalat för skadorna som uppstod under inspelningen. Föreningen Vikingaleden kräver nu ersättning på närmare 60 000 kronor. “Det är kaffepengar för dem” säger Peter Olausson, ordförande i Föreningen Vikingaleden till SVT Nyheter Värmland. #svt #nyheter #svtnyheter #theodyssey ♬ originalljud – SVT Nyheter

Тој додаде дека, иако се горди што нивниот брод е дел од холивудскиот спектакл, чувството го засенува разочарувањето поради, како што вели, неисполнетото ветување.

„Договорот беше ние да го поправиме бродот, а потоа финансиски да ни бидат надоместени трошоците“, рече Олаусон.

Од друга страна, портпарол на „Јуниверзал“ ги отфрли овие тврдења.

„Нашата евиденција покажува дека сите фактури поврзани со ‘Глад ав Гилберга’, вклучувајќи ги и поправките, се целосно платени. Студиото и продукцијата стапија во контакт со здружението за да се расчисти евентуалното недоразбирање“, соопштија од компанијата.

Инаку, „Одисеја“, чиј буџет изнесува околу 214 милиони евра, е инспирирана од истоимениот еп на Хомер и ја следи десетгодишната одисеја на Одисеј по Тројанската војна. Во главните улоги настапуваат Мет Дејмон, Том Холанд, Ен Хатавеј и Зендеја, а филмот веќе бележи рекордни резултати на светскиот бокс-офис.

„Ова е филм што не смеете да го пропуштите“: први реакции за „Одисеја“ на Кристофер Нолан