Филмот „Мајкл“ влезе во историјата како прв биографски филм што заработил повеќе од милијарда долари.

Биографскиот филм за Мајкл Џексон стана и првиот филм на „Лајонсгејт“ што го надмина тој рекорд и еден од само двата филма објавени во 2026 година што го постигнале тоа.

Според „Варајети“, филмот заработил 371,8 милиони долари на домашно ниво и 629,8 милиони долари на меѓународно ниво, со што неговата вкупна светска заработка достигна 1,1 милијарда долари.

Освен што стана првиот биографски филм што заработил повеќе од 1 милијарда долари, тој сруши и неколку други рекорди. Имаше највисок викенд на отворање за музички биографски филм, стана музички биографски филм со најголема заработка на сите времиња и стана филм со најголема заработка базиран на вистинска личност, надминувајќи го „Опенхајмер“.

Филмот е режиран од Антоан Фуква и беше објавен во кината на 24 април. Главните улоги ги играат Џафар Џексон, Ниа Лонг, Лаура Хариер, Џулијано Круе Валди, Мајлс Телер и Колман Доминго. Заплетот го следи животот на Мајкл Џексон, од неговите први музички чекори во „Џексон фајв“ неговиот подем во една од најголемите музички ѕвезди во светот. Покрај неговата кариера, прикажува и дел од неговиот приватен живот и некои од најпознатите настапи од неговата рана соло кариера.

Во подготовка е и продолжение на филмот. Продолжението, според „Лајонсгејт“ ќе се занимава со периодот што првиот филм не го опфатил. Бидејќи првиот дел се фокусира на детството на Џексон, почетокот на неговата кариера, се очекува вториот филм да ги прикаже подоцнежните фази од животот на кралот на поп-музиката.