Градоначалникот на општина Чаир, Изет Меџити на денешната прес-конференција од плоштадот „Скендербег“ соопшти дека годинава започнува нов меѓународен музички фестивал во општината насловен „Чаршија“, кој ќе се одржува во објектите на Сули Ан и Куршимли Ан во Скопската чаршија.

„Идентитетот на еден народ се зачувува, зајакнува и пренесува преку културата. Преку уметноста. Преку традициите што ги создава и ги остава на идните генерации. Затоа, Чаир сега ќе има свој фестивал. По Саемот на книгата, на Скопје и на Чаир им се придружува уште еден важен културен настан: првото издание на Меѓународниот музички фестивал „Чаршија“, изјави Меџити.

Тој истакна дека фестивалот ќе се одржи од 23 до 26 јули, а во овој период, како што соопшти Меџити, Сули Ан и Куршумли Ан ќе бидат трансформирани во сцени каде што ќе се одржуваат настапите.

„Од 23 до 26 јули, Сули Ан и Куршумли Ан ќе бидат трансформирани во сцени каде што класичната музика ќе се сретне со наследството на Старата чаршија. Под уметничко водство на Инва Мула и Дешира Ахмети, фестивалот ќе собере истакнати локални и меѓународни уметници, давајќи му на градот уште еден важен настан во културниот календар. Нашата цел е да изградиме културна институција која ќе расте со секое издание, ќе привлекува уметници од целиот свет и ќе го направи Скопје важно место за средба на класичната музика во регионот“, изјави градоначалникот.

Меџити ќе го урива, Ѓорѓиевски ќе го чисти – што ќе се случи со натпатникот кај Бит-пазар?

Меџити исто така истакна дека фестивалот претставува стратешка инвестиција во културата и идентитетот.

„Денес не претставуваме само нов фестивал. Денес ја претставуваме нашата визија Чаршија да биде позната не само по својот инфраструктурен развој, туку и како простор каде што се создаваат нови културни вредности. Веруваме дека културата е најсилниот мост меѓу луѓето, а фестивалот „Чаршија“ е токму таков мост – меѓу традицијата и современото, меѓу локалното наследство и светската уметност.“

Тој додаде дека целта на Општината е овој фестивал да стане познат меѓународен културен бренд и да се испрати порака дека Чаир има капацитет и визија да создава проекти од национално и меѓународно значење.