Машката младинска ракометна репрезентација на Македонија го претрпе четвртиот пораз на Европското првенство во Романија. Избраниците на Игор Илиевски загубија од Австрија со 28-24.

Македонските ракометари одиграа солиден натпревар и во поголем дел беа рамноправен противник, но не успеаја да ги искористат шансите во клучните моменти. Австрија во второто полувреме ја презеде контролата врз играта, направи предност од 24-18 и до крајот рутински ја сочува за победа.

Во македонскиот состав голманот Николовски имаше 11 успешни интервенции, додека Поповски и Матески беа најефикасни со по шест постигнати голови. Кај Австрија најдобар стрелец беше Фрич со седум погодоци.

По четирите порази на шампионатот, Македонија ќе продолжи во разигрувањето за пласман од 17. до 24. место. Следниот предизвик за младите ракометари е дуелот против Летонија, кој е закажан за утре.