Во скопската населба Тафталиџе ноќеска изгорел автомобил кој го користел судијата Ѓоко Ристов, обвинет дека имал заѕидано 350 илјади евра. Само неколку часа претходно неговата сопруга Симона Зориќ Ристова која е државна правобранителка,  имаше подолго интервју во кое зборуваше за предметот, но и за други состојби во судот.

Од Министерството за внатрешни работи информираат дека случајот бил пријавен околу 2 часот и 50 минути во СВР Скопје. Пожарот избувнал на патничко возило „Фолксваген пасат“ со скопски регистарски ознаки, сопственост на Ѓ.Р., на подрачјето на Карпош. Во пожарот биле оштетени и уште две возила – „Фолксваген туран“ сопственост на Д.М. и „Сангјонг“ сопственост на С.С., како и деловен објект во сопственост на Г.Л, велат од МВР.

Огнот бил изгаснат од екипа на Бригадата за противпожарна заштита Скопје, а од МВР велат дека во тек е увид за утврдување на причините и околностите за настанот.