Австралиската рударска компанија Middle Island Resources објави нови резултати од истражувачкото дупчење на проектот Бобија кај Љубовија, Србија, кои покажуваат постоење на плиток минерализиран систем богат со злато, сребро и обоени метали, објави РТС.

Во втората фаза од истражувањата биле изведени 17 бушотини со вкупна должина од 1.363 метри, при што е потврдена широка минерализација во централниот, северниот и западниот дел од наоѓалиштето. Според компанијата, овие зони се поврзани во еден голем систем кој се протега на околу 80.000 квадратни метри.

Како еден од најзначајните резултати е издвоена бушотината BMLRC022, каде што на само еден метар длабочина е откриен интервал од 41 метар со просечна содржина од 1,03 грама злато и 52,9 грама сребро по тон руда, како и присуство на бакар, олово и цинк.

Генералниот директор на австралиската компанија, Питер Спајерс, оценил дека Бобија „брзо се развива во големо плитко наоѓалиште на злато и сребро“, посочувајќи дека секое подрачје истражено досега покажало обемна минерализација близу до површината, додека границите на системот сè уште не се утврдени.

Според него, претходните истражувања првенствено биле фокусирани на оловот и цинкот, додека златото и среброто биле претежно занемарени.

Новото дупчење, како што изјавил тој, покажале дека токму златото и среброто го сочинуваат доминантниот дел од минерализираниот систем на Бобија.

Компанијата објави дека минерализацијата останува отворена кон исток и запад и дека ја подготвува третата фаза од истражното дупчење, кое ќе има за цел да го испита понатамошното проширување на лежиштето кон север и југ, како и континуитетот помеѓу централната, западната и северната зона.

Србија ги враќа сите златни резерви дома