Ново истражување покажува дека креатинот, додаток во исхраната најпознат по тоа што придонесува за зголемување на мускулната маса и подобрување на физичките перформанси, би можел да има значајна улога и во борбата против ракот, пишува „Лед бајбл“.

Научници од Универзитетот на Калифорнија во Лос Анџелес откриле дека креатинот може да го зајакне имунолошкиот систем така што ја подобрува работата на дендритските клетки – специјализирани клетки кои ги препознаваат туморите и го насочуваат имунолошкиот одговор против клетките на ракот.

„Имунотерапијата покажа извонреден потенцијал, но е успешна само кај дел од пациентите. Нашето истражување покажува дека креатинот не само што им помага на Т-клетките кои се борат против ракот, туку ја поттикнува и целата мрежа што ги поддржува и ги насочува. Тоа го прави креатинот ветувачки додаток кој може да го зајакне имунолошкиот одговор од кој зависат современите имунотерапии“, изјави професорката Лили Јанг, која го предводела истражувањето.

Голем дел од современите терапии против рак се насочени кон активирање на таканаречените Т-клетки убијци, кои ги препознаваат и уништуваат клетките на ракот. Сепак, овие третмани не се подеднакво ефикасни кај сите пациенти. Истражувачите утврдиле дека креатинот може дополнително да ја подобри нивната функција.

Во експериментите спроведени врз глувци, креатинот го забавил растот на туморите, а позитивни резултати биле забележани и при испитувања на човечки имунолошки клетки.

„Гледаме две можни примени на креатинот – како додаток што ќе го засили имунолошкиот одговор кај пациентите кои веќе примаат имунотерапија и како средство за подобрување на квалитетот на вакцините базирани на дендритски клетки пред тие да им бидат дадени на пациентите“, изјави коавторот на студијата Џејмс Елстен-Браун.

Какви се придобивките од креатинот?

Човечкото тело природно создава околу половина од потребната количина креатин, додека остатокот се внесува преку исхраната. Како додаток, креатинот е особено популарен меѓу спортистите бидејќи придонесува за поголема сила, подобри перформанси и побрзо закрепнување на мускулите.

Тој го зголемува создавањето на фосфокреатин, соединение што му овозможува на организмот побрзо да произведува енергија за време на физички напор. Дополнително ги активира клетките задолжени за обновување на мускулното ткиво, што придонесува за побрз раст и регенерација на мускулите.

Креатинот може да го поттикне и лачењето на одредени хормони поврзани со мускулниот раст, да ја зголеми количината на вода во мускулните клетки и да помогне во намалување на појавата на грчеви. Поради задржувањето течности, кај дел од луѓето мускулите изгледаат пополни и поизразени.

Можни придобивки и за мозокот

Освен за физичките способности, сè повеќе истражувања укажуваат дека креатинот може да има позитивно влијание и врз здравјето на мозокот.

Според досегашните научни сознанија, тој може да помогне во намалување на когнитивниот пад, да ги ублажи симптомите на замор и да биде корисен кај лица со долготрајни последици по прележан ковид.

Некои истражувања покажале дека креатинот му помага на мозокот полесно да се справи со недостаток на сон, а други укажуваат дека може да ги намали воспалителните процеси и оксидативниот стрес, кои негативно влијаат врз мозочната функција.

Научниците сметаат дека креатинот би можел да го намали и ризикот од појава на депресија и анксиозност, како и да има заштитно дејство врз нервниот систем. Поради неговото влијание врз имунитетот, се разгледува и можноста да придонесе за намалување на ризикот од развој на одредени видови рак.

Постојат и можни несакани ефекти

Иако креатинот генерално се смета за безбеден кога се користи во препорачани количини, експертите предупредуваат дека прекумерното внесување може да предизвика несакани последици.

Меѓу нив се воспаление на цревата, задржување течности и чувство на надуеност, кое најчесто е привремено. Некои истражувања укажуваат и на можни промени во показатели поврзани со функцијата на бубрезите, поради што лицата со постоечки бубрежни заболувања или хронични болести треба да се консултираат со лекар пред да почнат да користат креатин како додаток во исхраната.

Истражувачите нагласуваат дека се потребни дополнителни клинички испитувања кај луѓе за да се потврди дали креатинот навистина може да стане дел од идните терапии против рак, но досегашните резултати отвораат нови можности за негова примена и надвор од спортот.

Научниците откриваат: Креатинот може да помогне кај симптомите на Алцхајмеровата болест