Актерката Маришка Харгитај ќе биде водителка на 78. доделување на телевизиските награди Еми, со што ќе стане првата жена што ќе ја води церемонијата по 15 години.

Ен-би-си објави дека долгогодишната ѕвезда и извршна продуцентка на серијата „Закон и ред: оддел за специјални жртви“ (Law & Order: SVU) ќе застане на сцената на театарот „Пикок“ во Лос Анџелес на 14 септември. Свеченоста ќе се емитува во живо на Ен-би-си и на платформата „Пикок“.

„Да се раскажуваат важни приказни беше срцето на мојата кариера. Голема чест ми е што ќе бидам домаќинка на 78. Еми награди, во годината кога мојата сакана Ен-би-си одбележува 100 години, и што ќе ја прославиме оваа извонредна заедница на раскажувачи. Без разлика дали сте актер, режисер, костимограф или дизајнер на звук, сите сме привилегирани што создаваме телевизија која нè обединува. Без разлика како, каде или кога гледаме, заедно сме во смеата, солзите, љубовта кон приказните и возбудата од она што следува“, изјави Харгитај.

Последната жена што беше водителка на Еми беше Џејн Линч во 2011 година. Во последните години церемонијата најчесто ја водеа стендап-комичари, водители на вечерни емисии или комични актери.

Маришка Харгитај е едно од најпрепознатливите телевизиски лица. Таа ја толкува улогата на капетанката Оливија Бенсон од 1999 година, а „Закон и ред: оддел за специјални жртви“ оваа есен ќе ја започне својата 28. сезона и ќе ја достигне 600. епизода.

За улогата во серијата, Харгитај ја освои наградата Еми за најдобра главна актерка во драмска серија во 2006 година, а беше номинирана осум последователни години, од 2004 до 2011 година. Во 2017 година освои и документарна Еми како продуцентка на филмот „Јас сум доказ“ (I Am Evidence).

„Маришка заслужено се вбројува меѓу телевизиските икони. Малкумина оставиле толку силен белег на телевизијата како неа. Веќе 27 сезони таа внесува сила, сочувство и човечност во еден од најомилените телевизиски ликови. Додека Ен-би-си слави еден век незаборавни приказни, не можевме да замислиме посоодветна личност да ја предводи оваа прослава“, изјави Џен Нил, извршна потпретседателка за настани во живо и специјални програми на Ен-би-си.

Претседателот на Телевизиската академија, Крис Абрего, истакна дека Харгитај е една од најомилените телевизиски ѕвезди и дека нејзиниот талент и искреност ќе придонесат за незаборавна вечер посветена на најдобрите телевизиски остварувања.

Номинациите за 78. Еми наградите ќе бидат објавени на 8 јули, додека двете церемонии на „Криејтив Артс Еми“ ќе се одржат на 5 и 6 септември.

ВИДЕО | Џенифер Кулиџ со урнебесен говор на доделувањето на наградите Еми: Дебицки и јас имаме ист дилер на „оземпик“