Холивудски режисер осуден на две години затвор за измама на „Нетфликс“ во износ од 11 милиони долари
Холивудскиот режисер Карл Ерик Ринш, кој минатата година беше прогласен за виновен за измама на „Нетфликс“ во износ од 11 милиони долари, осуден е на две и пол години затвор.
Препорачано
Тој беше обвинет од обвинителството дека ги користел парите што „Нетфликс“ му ги доделил за завршување на научно-фантастичната серија, за да купи автомобили, криптовалути и други луксузни предмети за себе.
Режисерот, најпознат по филмот „47 Ронинс“ од 2013 година, беше прогласен за виновен за федерална измама и перење пари за злоупотреба на средства, пренесува Би-би-си.
Иако се соочуваше со казна до 90 години затвор, се очекуваше дека ќе добие многу полесна казна.
Судијата Џеј Ракоф го осуди на три години условен надзор по неговото ослободување од затвор, конфискација на имот во вредност од 11 милиони долари и парична казна од 700 долари.
Обраќајќи се пред судот пред изрекувањето на пресудата, Ринш се извини и рече дека ја прифаќа одговорноста за своите кривични дела.
– Денешната пресуда испраќа јасна порака за одвраќање: измама нема да се толерира – рекол американскиот обвинител Џеј Клејтон.
Според обвинителството, „Нетфликс“ му платил на Ринш околу 55 милиони долари за недовршената научно-фантастична серија, првично насловена „Бел коњ“, вклучувајќи дополнителни 11 милиони долари за кои тврдел дека му се потребни за да ја заврши продукцијата.
Наместо тоа, тврдат обвинителите, тој ги префрлил парите на својата лична сметка, каде што ги инвестирал и изгубил половина од нив во рок од неколку месеци.
Ги инвестирал преостанатите пари во криптовалути и ги потрошил за луксузни купувања, како што се автомобили „ролс-ројс“ и душеци во вредност од стотици илјади долари.
За време на едномесечното судење во Њујорк, неколку директори на „Нетфликс“ сведочеа дека одобриле само една сезона од серијата, која Ринш никогаш не ја завршил ниту ја испорачал.
Ринш, исто така, сведочеше во своја одбрана – реткост во кривичните постапки – тврдејќи дека имало недоразбирање и дека верувал дека парите биле наменети за одржување на проектот за време на пандемијата.
„Њујорк тајмс“ објави дека пријателите и колегите го опишале Ринш како личност чие однесување станало сè понепредвидливо кратко време откако потпишал договор со Нетфликс.
Според истиот извор, тој верувал дека може да предвиди удари од гром и вулкански ерупции, како и да го знае „тајниот механизам за пренос“ на вирусот ковид-19.
