Високите надворешни температури можат да го загрозат здравјето, но дали постои гранична вредност што човечкото тело може безбедно да ја поднесе? Хрватскиот институт за јавно здравје предупредува дека ризикот од топлотни болести не зависи само од температурата на воздухот, туку и од влажноста, траењето на изложеноста, физичкиот напор, возраста и здравствената состојба на личноста.

Од хрватскиот Институт за јавно здравје наведуваат дека не постои единствена максимална температура на воздухот што човечкото тело може да ја поднесе без здравствени последици, бидејќи толеранцијата на топлина не зависи само од температурата на воздухот. На ризикот од развој на топлотни болести истовремено влијае релативната влажност на воздухот, траењето на изложеноста, интензитетот на физичката активност, возраста, општата здравствена состојба и способноста за разладување на телото.

„Човечкото тело одржува константна телесна температура преку различни механизми, меѓу кои е потењето и испарувањето на потта од површината на кожата. Кога температурата и влажноста на воздухот се високи, испарувањето на потта станува помалку ефикасно, па затоа организмот потешко се лади. Истовремено, колку подолго е изложено на топлина или колку е поголем физичкиот напор, организмот произведува повеќе топлина отколку што може да ја пренесе во околината, што го зголемува ризикот од прегревање“, објаснуваат тие.

Чувствителноста на високи температури не е еднаква кај сите луѓе. Постарите лица, доенчињата и малите деца, трудниците и лицата кои страдаат од хронични болести, особено болести на срцето и крвните садови, белите дробови, бубрезите или дијабетесот, се изложени на поголем ризик од развој на здравствени проблеми во текот на топлотните бранови.

„Ризикот може дополнително да се зголеми и со одредени лекови кои влијаат на рамнотежата на течностите во телото или на способноста за регулирање на телесната температура. Од друга страна, здрави возрасни лица исто така можат да развијат сериозни последици ако се изложени на високи температури подолго време, особено во текот на работата или интензивните физички активности на отворено.

Поради тоа безбедноста за време на топлотни бранови не може да се процени само според температурата на воздухот. Потребно е да се земат предвид целокупните временски услови, траењето на изложеноста, нивото на физичкиот напор и индивидуалните фактори кои ја одредуваат способноста на организмот да се прилагоди на топлината“, нагласува ХЗЈЗ.

Една од најчестите последици од изложеност на високи температури е топлотната исцрпеност, која се појавува кога организмот повеќе не е во можност ефикасно да го надомести губењето на течности и да се разладува.

Кога е пеколно жешко, лекарите ги избегнуваат овие 8 секојдневни навики

Како да препознаете топлотен удар кај деца и како да го спречите

Сончаница или топлотен удар — еве како да ги препознаете опасните состојби