Откриена е официјалната причина за смртта на американската актерка Дејви Чејс, најпозната по улогата на Самара Морган во култниот хорор „Круг“ (The Ring) и по тоа што го позајми гласот на Лило во анимираниот филм „Лило и Стич“ (Lilo & Stitch).

Според официјалниот извештај на судскиот медицински истражител на округот Лос Анџелес, актерката починала од последици на сида, објави Би-би-си.

Чејс почина на 16 јуни, а нејзиниот менаџер Џон Рајан Помладиот минатата недела изјави дека причината за смртта била сепса предизвикана од менингитис.

Но, официјалните резултати од обдукцијата покажуваат дека основната причина за смртта е сида, додека како придружен фактор е наведена хронична злоупотреба на повеќе видови супстанции. Случајот и натаму се води како отворен.

Нејзиниот татко, Џон Дејвид Швалиер, потврди дека поранешната детска ѕвезда пред смртта била бездомничка и дека во Лос Анџелес живеела со својот партнер.

Дејви Чејс ја започна актерската кариера на само четиригодишна возраст, а првата телевизиска улога ја добила кога имала девет години во серијата „Сабрина – малата вештерка“ (Sabrina the Teenage Witch). Светска слава стекна во 2002 година со улогата на Самара Морган во хоророт „Круг“, за која ја освои и филмската награда на Ем-ти-ви за најдобар негативец.

Истата година го позајми гласот на Лило во анимираниот филм „Лило и Стич“, за што ја доби наградата Ени, а го синхронизираше и ликот на Чихиро во англиската верзија на јапонскиот анимиран филм „Авантурите на малата Чихиро“ (Spirited Away).

Според нејзиниот менаџер, Чејс целосно се повлекла од актерството во 2015 година.

Ештон Качер одби да коментира како било на контроверзните забави на Диди: Ух, имам многу да кажам, но не смеам