Новиот филм „Одисеја“ (The Odyssey) на Кристофер Нолан забележа спектакуларен почеток на светскиот бокс-офис, заработувајќи околу 226 милиони евра во првиот викенд од прикажувањето. Од нив, околу 119 милиони евра доаѓаат од меѓународните пазари, а околу 107 милиони евра од Северна Америка.

Со тоа, „Одисеја“ го оствари најголемото глобално отворање во кариерата на Нолан, надминувајќи ги „Темниот витез: враќањето“ (The Dark Knight Rises), кој стартуваше со околу 213 милиони евра, и „Темниот витез“ (The Dark Knight) со околу 169 милиони евра. Истовремено, филмот е третото најголемо отворање годинава, зад „Супер Марио: галактички филм“ (The Super Mario Galaxy Movie) и „Приказна за играчките 5“ (Toy Story 5).

Успехот е уште повпечатлив ако се земе предвид дека станува збор за филм со рејтинг Р, со времетраење од речиси три часа и без поддршка од веќе воспоставена филмска франшиза. Сценариото е инспирирано од епската поема „Одисеја“ на Хомер.

Во филмот, Мет Дејмон го толкува Одисеј, кралот на Итака, кој по Тројанската војна тргнува на опасно патување кон домот. Во актерската екипа се и Том Холанд, Ен Хатавеј, Роберт Патинсон, Лупита Њонго, Зендеја, Шарлиз Терон, Елиот Пејџ, Џон Бернтал и Џон Легуизамо.

Рекорди во ИМАКС

„Одисеја“ е првиот долгометражен филм снимен целосно со ИМАКС-камери, а токму проекциите во овој формат одиграа клучна улога во успехот на премиерата.

Филмот заработи околу 44 милиони евра од ИМАКС-проекциите ширум светот, односно 23 проценти од вкупната заработка, што претставува најдобро отворање на ИМАКС во споредливи пазари, надминувајќи го досегашниот рекордер „Одмаздници: крај на играта“ (Avengers: Endgame).

Извршниот директор на ИМАКС, Ричард Гелфонд, изјави дека ова е „трансцендентен момент“ за компанијата и додаде дека гледачите ќе ја добијат вистинската визија на Нолан само доколку филмот го гледаат во ИМАКС.

Најсилен старт во 48 пазари

„Одисеја“ беше прикажан на 73 меѓународни пазари, а најголема заработка оствари во Велика Британија и Ирска со околу 15 милиони евра, потоа во Франција со околу 11,7 милиони евра и Италија со околу 9,8 милиони евра.

Филмот веќе го забележа најдобриот старт на Кристофер Нолан во 48 земји, меѓу кои Франција и Италија, а за студиото „Јуниверзал“ претставува најголемо отворање досега на 11 пазари.

И покрај рекордниот старт, „Одисеја“ сè уште не почнала да се прикажува во Кина, Јапонија и Јужна Кореја, што остава простор глобалната заработка дополнително да расте во наредните недели.