Во период кога Гостивар се соочува со последиците од загадената вода за пиење, пејачката Ружица Милошеска – Брчиоска од рок-групата „Ареа“ упати апел до надлежните и до граѓаните да размислуваат и за еколошките последици од користењето флаширана вода.

Таа на социјалните мрежи напиша дека чистата вода што моментално се дистрибуира до гостиварчани е добредојдена и дека токму со неа деновиве функционираат многу семејства. Но, истовремено предупреди дека по завршувањето на кризата може да се појави нов проблем – илјадници празни пластични шишиња.

„Чистата вода што се дистрибуира до гостиварчани е добредојдена, поточно само со неа деновиве функционираме, но што ќе се случи со илјадниците празни пластични шишиња што сега се собираат во домаќинствата и кои по завршување на кризата со загаденава вода (посакувам што побрзо да заврши) ќе се расфрлаат насекаде?“, напиша таа.

Според Милошеска Брчиоска, уште сега треба да се организира акција за собирање на пластичниот отпад на посебни пунктови, бидејќи, како што наведува, постои опасност шишињата да завршат во реката Вардар и да предизвикаат ново загадување на животната средина.

„Би требало уште сега да се спроведе акција за собирање пластика на одредени пунктови, зашто многу лесно, знаејќи си ја културата, шишињата може да се најдат во Вардар и да предизвикаме ново загадување на животната средина. Дали општината има некаков план за ова, а ако не тогаш еколози ајде вклучете се, предлагајте!“, порача пејачката.

Интервју со Ружица Милошеска-Брчиоска: Храната за мене претставува гориво за одржување и функционирање на моето тело