Со натпреварот Тиквеш – Арсими денеска од 17.00 часот ќе стартува новата сезона во Првата македонска фудбалска лига.

Во Кавадарци домашниот тим сака со триумф да ја стартува новата сезона, во која има амбиции за што подобар пласман на прволигашката табела.

Кавадарчани со ново раководство, нов стручен штаб и доста промени во играчкиот кадар брка стартни три бода.

Не го потценуваат противникот, но од таборот на Тиквеш веруваат дека со помош на домашниот терен и публиката ќе дојдат до целта.

– Поминавме одлични подготовки, каде игравме со тешки противници и имавме шанса да видиме каде треба да се поправам, а каде сме добри. Првенството сега почнува побрзо од минатите години, и тие грешки не смеат да се повторуваат затоа што целта наша на секој натпревар ќе биде да одиме на победа и што е можно на повисок пласман на крајот на сезоната. Првото коло е најтешко, без разлика на противникот. Но, мислам дека доколку играме дисциплинирано и ги исполниме задачите од нашиот стручен штаб, ќе стигнеме до победа и на најдобар начин ќе ја стартуваме сезоната. Арсими има добра екипа која заслужува почит. Тоа го покажа минатата сезона и очекувам тврд натпревар како за прво коло, и нијанси да одлучуваат. Верувам дека со поддршката на нашите навивачи ќе се израдуваме на победа – изјави голманот на Тиквеш, Христијан Стевковски.