Тоа што се најавуваше веднаш по заминувањето на Јулијан Нагелсман по елиминацијата на германската фудбалска репрезентација во нокаут-фазата на Светското првенство, денеска го потврди тамошната федерација.

Јирген Клоп е нов селектор на репрезентацијата на Германија. 59-годишникот стратег потпиша четиригодишен договор на кампусот на Германската фудбалска федерација во Франкфурт и ќе го предводи националниот тим на Европското првенство во фудбал во 2028 година и на Светското првенство во фудбал во 2030 година.

Клоп ќе ја преземе функцијата од Јулијан Нагелсман на 15 август 2026 година. Нагелсман се повлече од функцијата селектор на Германија на 3 јули по елиминацијата од Светското првенство против Парагвај.

Петер Кравиц, Пепин Линдерс и Свен Бендер ќе му бидат помошници на Клоп. Кравиц и Линдерс претходно работеа заедно со Клоп во Ливерпул, каде што ја освоија Лигата на шампионите во 2019 година и титулата во Премиер лигата во 2020 година. Линдерс (43), неодамна работеше како помошник тренер на Пеп Гвардиола во Манчестер сити.

– Малку работи можат да нè зближат нас Германците како националниот тим. Токму тоа ја прави оваа улога толку посебна за мене. Благодарен сум за сè што можев да доживеам и научам во текот на изминатата година и пол во Ред Бул и за подготвеноста на сите да најдат решение што го овозможи ова. Сега со нетрпение очекувам да ја преземам оваа посебна улога во германскиот фудбал. Ќе пристапиме заедно со понизност и трпение додека се стремиме да изградиме тим кој се бори еден за друг, ужива во својот фудбал и кој луѓето низ целата земја можат целосно да го поддржат – се зборовите на Клоп.

🚨🇩🇪 OFFICIAL: Jurgen Klopp is back! He’s the new German national team head coach.

Done, confirmed until July 2030. 🫱🏻‍🫲🏼 pic.twitter.com/GwePhXs1HN

— Fabrizio Romano (@FabrizioRomano) July 24, 2026