Фудбалерите на Шкендија беа поразени со 2:1 од словенечкиот тим НК Браво во првиот натпревар од второто квалификациско коло на Конференциската лига на УЕФА.

Тетовските „црвено-црни“ поведоа во 11. минута со голот од пенал на Ендрит Красниќи, но домашните успеаја со пресврт да дојдат до триумф со головите на Копатин и Станковиќ.

По натпреварот во Љубљана, тренерот на Шкендија Артим Положани ја даде својата анализа:

– Им честитав на момците за нивниот настап. Мислам дека одигравме одличен натпревар со многу шанси против противник кој е исклучително тактички добро позициониран на теренот. Нормално, она што не функционираше беше завршницата во нападот, бидејќи во моменти кога натпреварот во европските купови произведува толку голем обем и создава шанси пред голот, што се можности за гол, мислам дека тоа е позитивно бидејќи има шанси. Дефинитивно мора да работиме на овој дел од завршницата бидејќи нормално во Европа секој гол е исклучително вреден, секој гол, особено во полето на противникот, е вреден, но она што ме мачи е фактот дека создадовме шанси, но немавме завршница – вели Положани.

Реваншот од овој двомеч за пласман во третото квалификациско коло ќе се игра на 30 јули од 20.00 часот на Националната арена „Тодор Проески“ во Скопје.

– Во вакви натпревари, практично натпревари што се во Европските купови, нема сигурност за резултатот. Значи, дури и да бевме во попозитивен резултат, практично во Скопјe ќе моравме да влеземе максимално за да го добиеме натпреварот. Значи, понекогаш овој негативен резултат е корисен и во однос на, на пример, влегување во играта со поинаков пристап. Не дека ако резултатот беше позитивен немаше да влеземе со максимален пристап, напротив, каков и да беше резултатот ќе влезевме, но уште еднаш нагласувам дека ми е жал за момците бидејќи одиграа добар натпревар, имавме шанси, но недостасуваше завршница. Браво воопшто не ме изненади. Го споменавме нивниот стил на игра вчера, тоа е тим кој е тактички дисциплиниран, кој чека на својата половина од теренот и ги чека грешките на противникот. Секако, головите можеа да се избегнат, но мислам дека ако повторно го користиме овој пристап и го подобриме тој последен дел, завршницата, мислам дека ќе имаме позитивен резултат во Скопје – се зборовите на Положани.