Портпаролот на Левица, Круме Богевски, на денешната прес-конференција изјави дека, според досегашните резултати, кандидатот за градоначалник на Скопје од Левица, Амар Мециновиќ, речиси сигурно ќе влезе во вториот изборен круг.

„Продолжува тенденцијата Амар Мециновиќ да влезе во вториот круг за градоначалник на Скопје. Разликата е над 1.500 гласа пред Каја Шукова, со што речиси е сигурно дека ќе оди во втор круг,“ изјави Богевски.

Тој посочи дека Левица остварила значителен раст на поддршката во повеќе скопски општини, при што, како што рече, партијата има повеќе гласови од СДСМ во Аеродром, Карпош, Гази Баба, Кисела Вода и во Ѓорче Петров.

Тој информираше и дека во Советот на Град Скопје, Левица ќе има за 50 отсто повеќе советници во споредба со претходниот состав, што партијата го смета за потврда на нејзиниот раст на скопско и национално ниво.