Во електровлечната потстаница Драчево, која се наоѓа меѓу железничките станици Лисиче и Драчево, е извршена кражба од големи размери, при што е уништен значаен дел од електроенергетската опрема на железничката инфраструктура, информираат од „МЖ Инфраструктура“.

При кражбата биле насилно превртени два големи електроенергетски трансформатори, секој со тежина од повеќе од 30 тони. Од нив било испуштено и истурено трансформаторско масло, а бакарните намотки и другите вредни компоненти биле целосно отстранети и украдени.

Од потстаницата биле украдени бакарни жици, бакарни шини и прачки, како и речиси сите уреди, а објектот е доведен во состојба на целосна нефункционалност.

Железничката инфраструктура на колена: Загуби ќе брои домашната индустрија, странците ќе нè заобиколуваат

-Овој настан не претставува само кражба на бакар и опрема, туку тежок напад врз критичната железничка инфраструктура и имотот на државата и граѓаните. Оштетувањето на објекти од ваков вид може да предизвика сериозни последици за безбедноста, стабилноста и редовното функционирање на железничкиот сообраќај – велат од „МЖ Инфраструктура“.

Оттаму додаваат дека според првичните проценки, директната материјална штета изнесува околу 5 милиони евра.

Од „МЖ Инфраструктура“ апелираат до надлежните институции случајот темелно и итно да биде истражен, а сторителите, како и сите лица вклучени во кражбата, транспортот и понатамошното отуѓување на украдените материјали, да бидат идентификувани и да понесат соодветна одговорност.