Зошто толку многу денешни холивудски ѕвезди изгледаат… исто? Одговорот можеби лежи во комбинацијата од одлуките на кастинг директорите, трендовите во естетската хирургија и, како и за многу други работи денес, влијанието на социјалните мрежи, пишува „Холивуд репортер“.

Старите холивудски имиња имаат нешто што веднаш ги издвојува. Мерил Стрип, Ал Пачино, Том Хенкс, Морган Фримен, Мет Дејмон, Дензел Вашингтон и Бред Пит се актери чиј изглед и присуство се невозможно да се помешаат со некој друг. Самите имиња создаваат слика за уникатни лица и препознатливи личности. Но, кај новата генерација актери сè почесто се забележува една поинаква појава – одредена униформност во изгледот.

Не значи дека сите млади ѕвезди направиле естетски корекции, иако многумина навистина го сториле тоа. Но, денешниот идеал за убавина сè повеќе добива генерички изглед. Некои го нарекуваат „инстаграм лице“, а поради сè поголемото влијание на вештачката интелигенција врз стандардите за убавина, овој феномен добива и ново име – „слоуп фејс“. Зборот „слоуп“ доаѓа од интернет сленгот и се користи за содржина што е масовно произведена, безлична или направена без многу индивидуалност. Во контекст на лицето, „слоуп фејс“ сугерира дека дел од денешните идеали за убавина создаваат лица кои изгледаат како да се произведени според исти дигитални или естетски правила.

Авторот на анализата вели дека првпат ја забележал оваа промена пред една деценија, на забави организирани од големите телевизиски мрежи. Постарите актери на настаните на „Си-би-ес“, „Ен-би-си“ и „Фокс“ имале поразлични и препознатливи лица, додека младите актерки на забавите на Си-Даблју изгледале како мала армија со ист естетски шаблон – големи очи како принцези од цртани филмови, полни усни и долга бујна коса.

Кога различноста станува реткост

Денес е сè потешко да се сетиме кога последен пат сме виделе филмска ѕвезда помлада од 40 години со несовршени заби, изразит нос или некоја друга физичка карактеристика што отстапува од современиот идеал.

Каде се актерите со забележливи маани, со необични лица или со изглед што не може лесно да се вклопи во одреден шаблон? Каде се главните актерки кои не мораат да имаат совршена фигура според денешните стандарди или главните актери кои во сцена без маица не изгледаат како фитнес модели со речиси невозможно низок процент телесни масти?

Хомогенизацијата на холивудската убавина е резултат на повеќе фактори. Дел од одговорноста ја носат луѓето кои одлучуваат кој ќе стане ѕвезда, но и самите актери кои сè почесто бараат помош од пластични хирурзи, стоматолози и дерматолози за да го постигнат изгледот што моментално е популарен и за кој веруваат дека може да им ја продолжи или подобри кариерата.

Секако, голема улога имаат и социјалните мрежи. Притисокот порано најчесто доаѓал зад сцената – од агенти, менаџери и луѓе од индустријата. Денес актерите само со едно отворање на телефонот можат да се соочат со илјадници коментари за својот изглед. Наместо да ги прифатат карактеристиките што ги прават различни, многумина се обидуваат постојано да ги „поправаат“ сите детали што не се вклопуваат во актуелниот идеал.

Актерот Бери Кеоган, познат по филмот „Солтбурн“, неодамна отворено зборуваше за навредите на сметка на неговиот изглед. Тој изјавил дека коментарите за неговиот изглед го натерале да се повлече, да избегнува јавни настани и да не сака да излегува од дома.

Тоа го кажува актер кој е номиниран за „Оскар“ и кој доживеа голем успех во последните години, иако не одговара на класичниот холивудски изглед на филмски заводник. Притисокот за оние кои немаат таква слава може да биде уште поголем, особено за жените, бидејќи мажите традиционално имаат поголема слобода кога станува збор за физичкиот изглед.

Кога секоја различност станува тема на разговор

Дури и најубавите актерки не се поштедени од критики ако имаат нешто што се разликува од новиот стандард.

Ања Тејлор-Џој често е мета на коментари поради широко поставените очи. Миа Гот се издвојува со речиси незабележливите веѓи, додека изгледот на Сидни Свини предизвика огромни јавни дебати.

Колку повеќе расте еднаквоста во изгледот, толку повеќе секоја различност станува забележлива. Луѓето сè почесто посочуваат кој е „оној што не се вклопува“ во групата.

Дали виртуелните кастинзи го променија Холивуд?

Една друга причина за промената можеби е начинот на кој актерите денес добиваат улоги. По пандемијата, виртуелните аудиции станаа вообичаени. Актерите често испраќаат снимки од дома или учествуваат на први кастинзи преку видеоразговор.

Иако ова е полесно и побрзо за сите, постои прашањето дали нешто е изгубено во процесот. Кога актерот ќе влезе во просторија, неговото присуство, енергија и харизма можат да остават силен впечаток. На екран, пак, првиот впечаток се сведува на рамна слика во мала рамка, каде што совршената симетрија на лицето може да добие поголема вредност од карактерот и индивидуалноста.

Сè помлади луѓе бараат естетски корекции

Популарноста на естетските процедури расте. Според последните истражувања на Американската академија за лицева пластична и реконструктивна хирургија, бројот на процедури се зголемува од 2023 година, а пациентите стануваат сè помлади.

Голем дел од хирурзите сметаат дека просечната возраст на луѓето кои прават затегнување на лице се намалува. Кај познатите личности интересот е уште поголем, бидејќи камерата и јавната изложеност создаваат дополнителен притисок.

Последниве години се промени и начинот на кој познатите зборуваат за естетските интервенции. Некои отворено признаваат дека направиле операции, како Дениз Ричардс со затегнувањето на лицето, Меган Фокс и Кендал Џенер со операциите на градите. Други, како Кортни Кокс, Кристин Дејвис и Сајмон Кауел, зборувале за жалење поради претераната употреба на филери.

Оние кои се задоволни од резултатите, пак, најчесто продолжуваат тивко да ги одржуваат промените без многу зборување.

На крајот останува старото прашање – дали убавината навистина е во окото на набљудувачот? Дали ѕвездите треба повеќе да ги прифаќаат своите несовршености? Или дали кастинг директорите треба да бараат лица што се различни наместо совршено вклопени во тренд?

Одговорот не е едноставен. Луѓето отсекогаш биле привлечени од убавината, а истражувања уште пред повеќе од половина век покажале дека физичката привлечност е еден од најсилните фактори што влијаат врз тоа како ги доживуваме другите.

Но, токму затоа можеби денес најмногу ни недостигаат лицата што не изгледаат совршено – туку незаборавно.

ФОТО | Која е Тили Норвуд? Првата актерка со вештачка интелигенција во Холивуд предизвика бурни реакции