Министерот за надворешни работи и надворешна трговија Тимчо Муцунски преку објава на Фејсбук упати критики до поранешниот министер за надворешни работи Бујар Османи, кој одново гообјави видеото во кое на табла ја црта и објаснива преговарачката рамка, дека тој е последниот човек кој има право да држи лекции за тоа што е прифатено, а што не во преговарачкиот процес.

Муцунски го обвини Османи дека ги извртува фактите и дека нема политички кредибилитет да ја коментира политиката на актуелната Влада.

Според Муцунски, Османи „многу добро знае што преговараше, што прифаќаше и во каква позиција ја остави државата“, поради што, како што наведува, не треба „да ги извртува фактите и да толкува туѓи изјави“.

Политичар кој не успеа да ја добие довербата ниту на своите најблиски сограѓани во Чаир, ниту на своите соседи, ниту на луѓето што најдобро го познаваат, навистина е последниот што треба да држи лекции за политички легитимитет – напиша Муцунски, додавајќи дека по таков пораз „многумина би покажале политичка одговорност и би се повлекле, наместо да продолжат да делат лекции“.

Муцунски го потврди она за што четири години трпам критики, вели Бујар Османи

Министерот истакна дека ставот на актуелната Влада е непроменет од почетокот на нејзиниот мандат.

За разлика од неговите спинови, позицијата на оваа Влада е јасна и непроменета од првиот ден. Повеќе од две години слушаме обвинувања дека ќе попуштиме, ќе се откажеме и ќе прифатиме сè што претходно било договорено. Наместо тоа, со дела покажавме доследност, принципиелност и јасна заштита на македонските национални интереси. Тоа денес е јасно и дома и кај нашите меѓународни партнери – наведува министерот.

Поранешниот министер Османи пак претходно на Фејсбук напиша дека четири години тврди дека протоколите не се дел од преговарачката рамка.

Четири години трпам критики, напади и навреди. Четири години цртам на табли, објаснувам, повторувам. Еден чекор поминат – Протоколот не е дел од рамката  – напиша Османи.