Независна листа во Општина Центар поднела приговор до Државната изборна комисија (ДИК), поради тоа што нивното лого не било отпечатено на гласачкото ливче. Како што наведуваат, ваквиот пропуст направил сериозна повреда на Изборниот законик, конкретно на членовите 97 став 1 и 98 став 1.

„Врз нашите кандидати е направена флагрантна дискриминација, со што сме ставени во нерамноправна положба и е поништена еднаквоста на избирачкото право. Оваа неправилност е констатирана на целата територија на Општина Центар и може да претставува основа за поништување на изборите во оваа општина“, се вели во нивната реакција.

Од независната листа објаснуваат дека кандидатите за градоначалник и носител на советничката листа се обиделе да поднесат приговор преку електронскиот систем на ДИК, но дека системот во тој момент не функционирал.

Поради тоа, приговорот бил испратен по електронска пошта и заведeн во архивата на ДИК.

Како доказ, независните кандидати приложиле фотографија која, според нив, покажува дека логото било доставено до Општинската изборна комисија уште на 11 септември 2025 година.

На последната прес-конференција на ДИК, одржана во 15 часот, беше соопштено дека до тој момент не се пријавени нерегуларности и дека изборниот процес тече мирно.