Министерството за внатрешни работи (МВР) информира дека до отворањето на избирачките места биле регистрирани 20 пријави за нарушување на изборниот молк.

Најмногу пријави пристигнале од подрачјето на СВР Скопје (6), потоа СВР Куманово (4), СВР Велес (3), додека по две пријави се евидентирани на подрачјата на СВР Охрид, СВР Штип и СВР Битола. Една пријава е регистрирана и во СВР Струмица.

По преземени мерки и проверки, не се потврдени 15 од пријавените настани, соопштува МВР.

Дополнително, биле евидентирани и 47 објави на социјалните мрежи со содржини кои повикуваат на гласање за одредени кандидати, како и видеа и фотографии од партиски активности во изборни штабови, што претставува прекршување на изборниот молк.

МВР нагласува дека гласањето на болни и изнемоштени лица, како и на затвореници, поминало без нарушувања, освен еден изолиран настан кој е регистриран.