Илјадници демонстранти повторно излегоа на улиците на Њу Делхи, еден ден по жестоката полициска интервенција против поддржувачите на Партијата на лебарките (ЦЈП), младинско движење што бара темелни реформи во образованието и оставка од министерот Дармендра Прадан, објави „Би-би-си“.

Десетици илјади млади луѓе вчера се обидоа да стигнат до индискиот парламент, иако маршот беше забранет. Полицијата употреби палки и солзавец, а во судирите беа повредени најмалку 60 демонстранти. Безбедносните сили ги урнаа бината и импровизираните шатори поставени кај Џантар Мантар, традиционално место за протести во главниот град.

Според полицијата, во немирите биле повредени и 118 нејзини припадници, додека 70 демонстранти биле приведени. Учесници во протестот тврдат дека полицајците тепале и жени, а на социјалните мрежи се појавија снимки од повредени и онесвестени луѓе. Властите, пак, ги обвинија демонстрантите дека фрлале камења, ги пробивале барикадите и оштетувале службени возила и јавен имот.

Опозицискиот лидер Рахул Ганди застана зад студентите, оценувајќи дека нивните барања се оправдани. Во вторникот тој предводеше пратеници и членови на Конгресната партија кон домот на премиерот Нарендра Моди, барајќи одговорност за полициското насилство. Ганди повика на оставки од Моди и од министерот за внатрешни работи Амит Шах.

ЦЈП настана како сатирично движење откако претседателот на Врховниот суд ги нарече „лебарки“ невработените млади луѓе што се насочуваат кон новинарството и активизмот. Иако не е регистрирана како политичка партија, организацијата прерасна во силно протестно движење.

Демонстрантите веќе еден месец кампуваат кај Џантар Мантар. Дополнително внимание привлече активистот и просветен работник Сонам Вангчук, кој на 28 јуни започна штрајк со глад. Полицијата насилно го однесе во болница, каде што тој продолжува да гладува.

Главна причина за протестите е скандалот со протечените прашања од медицинскиот приемен испит НЕЕТ, кој го полагаа околу 2,28 милиони кандидати. Испитот беше поништен и повторен, а семејствата тврдат дека повеќе од 20 студенти извршиле самоубиство поради последиците од скандалот.

Министерот Прадан одбива да поднесе оставка и демонстрантите ги нарекува „деструктивни елементи“. ЦЈП, сепак, најавува дека нема да се повлече и ги повика граѓаните да продолжат со протестите.

ВИДЕО | Разорни монсуни во Индија: се сруши станбена зграда, четворица загинаа