ВИДЕО | Песни, аплаузи и еуфорија во партиските штабови
Возбудлива изборна ноќ во Скопје – песни, аплаузи и возбуда во штабовите на ВМРО-ДПМНЕ, Вреди и СДСМ, додека партиите ги очекуваат првите резултати.
По затворањето на избирачките места, атмосферата во штабовите на политичките партии низ Скопје е полна со енергија, исчекување и емоции.
Препорачано
Во штабот на ВМРО-ДПМНЕ се собираат поддржувачи, а на големиот видео-бим се прикажуваат снимки од предизборните спотови на партијата.
Од звучниците одекнуваат патриотски песни, луѓето се поздравуваат, се фотографираат и со возбуда ги следат првите информации за одѕивот.
Весело е и во штабот на движењето Вреди, каде што кандидатот за градоначалник на Чаир, Изет Меџити, беше пречекан со громогласни аплаузи и со еуфорични извици. Поддржувачите со знамиња и транспаренти го поздравуваат неговото пристигнување, а музиката и навивачките повици придонесуваат за вистинска прослава на изборната вечер.
И во штабот на СДСМ на Бихаќка се собираат членови и симпатизери. Расположението е внимателно, но полека расте, додека сите ги очекуваат првите неофицијални резултати.
Поддржувачи се собираат и во главниот штаб на Левица во Скопје.
Во текот на вечерта се очекува партиите да се обратат со првични изјави и проценки за изборниот резултат, откако ќе пристигнат првите официјални податоци од Државната изборна комисија.
