Потпретседателот на ВМРО-ДПМНЕ, Владо Мисајловски, изјави дека очекува неговата партија да обезбеди голема победа уште во првиот круг од локалните избори.

Тој посочи дека ВМРО-ДПМНЕ има убедливо водство во повеќе општини ширум државата и дека резултатите што пристигнуваат од терен укажуваат на јасна надмоќ.

– ВМРО-ДПМНЕ е на прагот на огромна победа, разликата е 3:1, а има општини каде што таа достигнува и 6:1, 7:1, па дури и 10:1. Во некои општини СДСМ е трета партија – изјави Мисајловски.

Според него, веќе се обезбедени градоначалници во Кисела Вода, Охрид, Радовиш, Берово, Ѓорче Петров, Гази Баба, Пехчево, Делчево, Прилеп, Битола, Гевгелија, Сопиште, Штип, Велес, Бутел, Аеродром, Јегуновце и Вевчани, а во повеќе други општини се очекува конечна потврда на резултатите.

– Гласовите сè уште се пребројуваат, но трендот е јасен. На прагот сме на убедлива победа и во Струмица. Орце Ѓорѓиевски води убедливо во Скопје – со разлика од 5:1, а во некои општини и 6:1. Имаме водство и во Центар – нагласи Мисајловски.