Управниот суд ја одби тужбата на политичка партија, која поднесе тужба против одлуката на Државната изборна комисија да ја поништи нивната листа за Совет на Град Скопје поради тоа што на неа се најде починато лице, со што одлуката на ДИК останува во сила.

„Сите евентуални гласови за Совет на Град Скопје кои ќе бидат дадени за оваа политичка партија ќе се сметаат за неважечки. Такви насоки се дадени на избирачките одбори во Скопје,“ изјави на денешната прес-конференција претседателот на ДИК, Борис Кондарко.

За случајот се дозна јавно откако ДИК соопшти дека на кандидатската листа за членови на Советот на Град Скопје, поднесена од еден политички субјект, било предложено починато лице. По добиените информации, Комисијата прибавила извод од матична книга на умрени и утврдила дека лицето не може да биде кандидат бидејќи нема лична и неотповиклива изјава за прифаќање на кандидатурата, како што налага Изборниот законик.

„Поради тоа, ДИК ја поништи потврдената листа и писмено го извести Јавното обвинителство, кое ќе ги провери податоците и ќе постапи согласно своите надлежности,“ додаде Кондарко.

Членот на ДИК, Александар Даштевски, потсети дека вакви случаи имало и во минатото.

„И минатата година беше поднесена листа со починато лице, која ја отфрливме, а документите беа предадени на Обвинителството, што потоа отвори кривична постапка,“ рече Даштевски.