Силно невреме со поројни дождови, силен ветер, грмежи и град синоќа го зафати Стар Дојран, при што беа откорнати десетици повеќегодишни дрвја на повеќе локации. Паднати се јавори и борови, багреми и црници, оштетени се натстрешници, урбана опрема на плажата, неколку возила, како и покривот на еден од дуќаните на градскиот пазар, информираа од општината.

Според информациите од Доброволното противпожарно друштво „Дојран“, кое прво излезе на теренот да интервенира, големи дрвја се паднати во градскиот парк и на игралиштето со справи за вежбање. Паднати дрвја имало и кај детскиот рингишпил на шеталиштето кај хотелот „Романтик“, пицеријата „Вавилон“, на главниот пат поради што извесен период патот бил прооден само во една сообраќајна лента, а неколку часови во прекин била и електричната енергија од безбедносни причини.

„Стар Дојран беше зафатен од силно невреме проследено со обилни врнежи и силен ветар кое за среќа помина без повредени, само со материјална штета. Екипите на ДППД Дојран и доброволна група граѓани, екипите на ЕВН веднаш излегоа на терен и започнаа со расчистување на паднатите дрвја и причинетите штети, и на терен ќе останат цела ноќ, сè до нивно расчистување“, објави на Фејсбук градоначалникот на Дојран, Илија Тентов.

Тој упати апел до сите граѓани да пријават непроодни улици, поплавени куќи, подруми, со цел да се интервенира брзо и соодветно.

ВИДЕО | Србија ја зафати големо невреме, улиците во Златибор станаа реки