Министерот за внатрешни работи Панче Тошковски оцени дека денешните избори биле едни од најмирните и најбезбедните во поновата историја на државата без ниту еден посериозен инцидент или нарушување на јавниот ред и мир.

Гласањето, според Тошковски, почнало на сите гласачки места освен на 84 главно поради технички проблеми кои биле решени во рок од најмногу два часа.

– Регистрирани беа 29 прекини на гласањето од 15 до 30 минути најчесто поради технички проблеми со уредите за идентификација најмногу на подрачјето на СВР Тетово и СВР Охрид.
Пријавени се 91 настан на територијата на Република Македонија најмногу за агитирање и можен поткуп, а дел за фотографирање на гласачко ливче, лепење плакати и упатување закани.
Во текот на денот лишени од слобода се 11 лица поради поткуп, уништување или фотографирање на гласачко ливче. Четири лица се ослободени, а за 7 има натамошна постапка – изјави Тошковски на прес-конференција.

Тој додаде дека биле пријавени 7 настапи со наводна инволвираност на полициски службеници, од кои за 6 немало основа, а за еден се проверува.

– Сите податоци потврдуваат дека денешниот изборен процес помина во мирна, фер и демократска атмосфера, без ниту еден посериозен инцидент или нарушување на јавниот ред и мир – додаде Тошковски.