Фудбалерите на Вардар ќе имаат дополнителен мотив во двомечот против Рига во второто квалификациско коло од Конференциската лига. Раководството на клубот одлучи да обезбеди премија од вкупно 100.000 евра доколку „црвено-црните“ успеат да го елиминираат летонскиот претставник и да се пласираат во следната рунда.

Во клубот владее оптимизам дека тимот може да направи нов исчекор на европската сцена, а бонусот треба да биде дополнителен поттик за фудбалерите пред двата важни натпревари.

Првиот натпревар меѓу Вардар и Рига се игра утревечер со почеток од 20:00 часот на Националната арена „Тодор Проески“ во Скопје, додека реваншот е закажан за 28 јули во Летонија.