ВО ЖИВО | Локални избори во Македонија — втор круг
Во Македонија се одржува вториот круг од Локалните избори 2025, на кој граѓаните избираат градоначалници во 32 општини и во Град Скопје, а на три избирачки места во Шуто Оризари ќе има прегласување за советници.
Препорачано
Ова се осми по ред локални избори во земјата, а четврти спроведени по актуелниот систем, во кој се избираат градоначалници и советнички листи во 80 општини и во Град Скопје. Вкупно учествуваат 22 политички партии, 19 коалиции и 119 независни кандидатури.
🔴 ОД МИНУТА ВО МИНУТА:
Неважечки се над 19.000 ливчиња во вториот круг и секое шеснаесетто ливче за Град Скопје
Во вториот круг од локалните избори, кој се одржа на 2 ноември во 33 општини, се евидентирани вкупно 19.287 неважечки гласачки ливчиња на изборите за градоначалници, што претставува околу 5,6 отсто од сите употребени ливчиња.
Само четири жени се избрани за градоначалнички
И покрај тоа што во трката за градоначалник на Локалните избори се натпреваруваа вкупно 32 жени, избрани беа само четири, што претставува само 10, 35 отсто од сите 309 кандидати за градоначалници.
ВМРО-ДПМНЕ ќе раководи со Скопје и 54 општини, ВРЕДИ со 9, СДСМ 6, НАИ 4, ЗНАМ и УР по 1, а во една независен кандидат
Коалицијата предводена од ВМРО-ДПМНЕ, според резултати од двата круга на локалните избори, ќе има градоначалници во Скопје и во 54 општини. Втора по бројот на освоени градоначалнички места е коалиицијата Вреди со девет. Коалицијата на СДСМ ќе има шест градоначалници, НАИ 4, а Движење ЗНАМ и Унијата на Ромите по еден градоначалник. Една општина ќе ја води независен кандидат.
„Мекиците не се во тренд, време е за кекс“ – Пешевска не му ги заборава на Ахмети ланските гурабии
Пратеничката од ВМРО-ДПМНЕ, Жаклина Пешевска, на социјалните мрежи објави фотографија со колеги и поддржувачи од партијата, придружена со порака упатена кон лидерот на ДУИ, Али Ахмети.
Ахмети по вториот круг: Време е за обнова и за самокритика!
По вториот круг од локалните избори, лидерот на ДУИ, Али Ахмети, изјави дека НАИ ги добила гласовите на народот и на општините со над 23.000 гласови, сметајќи ја оваа победа за морален и политички мандат да се продолжи со работа пообединета, подисциплинирана и попосветена на граѓаните
Орце со порака до Амар: Загреј го столчето и заврши факултет!
Новиот градоначалник на Град Скопје, Орце Ѓорѓиевски, му упати порака на својот противкандидат Амар Мециновиќ од Левица, по завршувањето на вториот круг од локалните избори.
Апасиев: Левица ја дуплираше поддршката, Амар е новото лице на партијата
Ова е пирова победа на режимот. Јас како претседател на Левица оваа вечер ќе честитам победа само на градоначалниците во Кичево и Брвеница – изјави Апасиев
Орце Ѓорѓиевски со порака до политичките противници: Нека ви е простено од мене, а Бог си знае што ќе прави понатаму!
Иако беше напорен и тежок период, се групираа, се собира, разни коалици правеа – дел јавни, а дел тајни, покажавме дека Скопје е вистински обединето и сите заедно денеска ги поразивме на куп, изјави новоизбраниот градоначалник на Град Скопје од редовите на ВМРО-ДПМНЕ, Орце Ѓорѓиевски.
Мицкоски објави голема победа на коалицијата предводена од ВМРО-ДПМНЕ
Претседателот на ВМРО-ДПМНЕ Христијан Мицкоски на вечерашната прес-конференција објави голема победа на коалицијата предводена од ВМРО-ДПМНЕ на локалните избори.
Биљал Касами освои нов мандат во Тетово, во Струга Менди Ќира слави тесна победа
Актуелниот градоначалник на Тетово, Биљал Касами од Беса и коалицијата „Вреди“, ќе биде на чело на општината уште еден мандат, откако денес, во вториот круг од локалните избори, го победи Блерим Реџепи од ДУИ со околу 5.000 гласа разлика, покажуваат податоците на Државната изборна комисија (ДИК).
Мециновиќ задоволен од изборниот резултат: Во вториот круг освоив двојно повеќе гласови
Кандидатот за градоначалник на Град Скопје од партијата Левица, Амар Мециновиќ, изрази задоволство од резултатите во вториот круг на локалните избори
ГАЛЕРИЈА | ВМРО-ДПМНЕ на нозе во Кичево
Александар Јовановски, кандидатот на ВМРО-ДПМНЕ и победник на изборите во Кичево ВМРО-ДПМНЕ слави победа.
Сајкоски им порача на кичевци: Вечерва ни доаѓа Мицкоски!
Генералниот секретар на ВМРО-ДПМНЕ, Ѓорѓија Сајкоски, вечерва им се обрати на кичевци по изборната победа на кандидатот на партијата Александар Јовановски.
Филипче: Засега имаме 6 градоначалници, не поднесувам оставка туку партијата ќе се консолидира
Претседателот на СДСМ Венко Филипче на прес-конференција им честиташе на граѓаните за достоинственото гласање во вториот круг од локалните избори.
Дел од скопските градоначалници на „бакнирака“ кај Орце
Пред штабот веќе е поставена голема бина, а стотици поддржувачи со знамиња и факели го поздравија доаѓањето на Ѓорѓиевски, додека низ звучниците се слушаа патриотски песни. Меѓу присутните има и дел од новоизбраните градоначалници од другите општини, пратеници и членови на раководството на партијата.
Лукровски прогласи победа во Карпош: Ова не е победа на една партија, ова е победа на сите што сакаат промени
-Драги мои карпошани, вечерва зборувам со срце полно гордост и благодарност. Не се борев за функција, туку за доверба. Денес не победувам јас, победува Карпош - напиша Лукроски.
Плоштадот во Кичево се полни со народ, се очекува обраќање на победникот
Александар Јовановски, кандидатот на ВМРО-ДПМНЕ и победник на изборите во Кичево, ги повика сите кичевчани на заедничка прослава на плоштадот.
Владко Грозданов е новиот градоначалник на Кочани
Според конечните резултати објавени од Државната изборна комисија (ДИК), кандидатот на коалицијата „Твоја Македонија“ предводена од ВМРО-ДПМНЕ, Владко Грозданов, обезбеди убедлива победа.
Еуфорија пред штабот на ВМРО-ДПМНЕ во Скопје – Орце Ѓорѓиевски пречекан како херој
Пред штабот е поставена голема бина, а атмосферата е налик на вистински митинг со музика, знамиња и пеење. Присутните го поздравија Ѓорѓиевски со извици на поддршка и со македонски знамиња во рацете.
Јовановски се качи на прозор за да ја прослави победата во Кичево
Кандидатот за градоначалник на Кичево на ВМРО-ДПМНЕ, Александар Јовановски, качен на прозор слави победа на локалните избори.
Левица: Мртва трка меѓу Амар Мециновиќ и Орце Ѓорѓиевски, а во Карпош и Центар имаме водство
Портпаролот на Левица Круме Богевски на првата прес-конференција по затворањето на избирачките места вели дека резултатите што ги има партијата се неизвесни.
Грозданов води во Кочани, пред Венко Крстевски
Кандидатот на ВМРО – ДПМНЕ, Владко Грозданов, во Кочани води пред Венко Крстевски, предложен од група граѓани.
Според партиски извори, од досега обработените гласови од 43 избирачки места, кандидатот на ВМРО – ДПМНЕ и коалицијата Владко Грозданов има 5.740 гласа, а независниот Венко Крстевски 3.909.
ДИК: Од обработени 80,85 % од гласовите за градоначалник на Град Скопје, Орце Ѓорѓиевски - 59,41%, Амар Мециновиќ 34,80%
Излезноста во вториот круг за градоначалник на Град Скопје изнесува 33,08 отсто. Од вкупно регистрирани 474.304 избирачи во избирачкиот список, гласале 126 867 граѓани.
Во првиот круг за градоначалник на Скопје одѕивот беше 49,04% од вкупниот број на регистрирани избирачи во избирачкиот список. Ѓорѓиевски во првиот круг освои 91 663 гласа или 39,41 проценти од гласовите, додека кандидатот на ПП Левица, Мециновиќ 30 665 гласа или 13,18 проценти од вкупниот број гласови.
Тапани и песни ечат во Кичево – ВМРО-ДПМНЕ веќе слави победа
Тапани и песни ечат вечерва пред штабот на ВМРО-ДПМНЕ во Кичево, каде што симпатизерите на коалицијата „Твоја Македонија“ веќе ја започнаа прославата на, како што велат, сигурната победа на нивниот кандидат Александар Јовановски. Атмосферата станува сè погласна, а кичевци масовно излегуваат на улиците за да го проследат изборниот финиш.
Тошковски: Вториот круг помина во мирна, фер и демократска атмосфера
И вториот круг помина во мирна, фер и демократска атмосфера. Немаше сериозни инциденти, без нарушување на јавниот ред и мир, соопшти министерот за внатрешни работи Панче Тошковски на прес-конференција.
ВМРО-ДПМНЕ води во 19 општини, СДСМ во 4, ВРЕДИ во 4, НАИ во 2 и Унија на Роми во 1
Според првичните резултати објавени од Државната изборна комисија (ДИК), по преброени 45,35% од гласовите, кандидатите на ВМРО-ДПМНЕ водат во 19 општини. СДСМ води во 4, исто како и Коалицијата ВРЕДИ (ВЛЕН). Националната алијанса за интеграција (НАИ) води во две општини, а Унијата на Роми има предност во Шуто Оризари.
Поддржувачи на Орце Ѓорѓиевски веќе слават кај Порта Македонија
Како што забележуваат екипите на „Слободен печат“, граѓаните признаваат дека дојдени се со цел да ја прослават изборната победа на кандидатот за градоначалник на Град Скопје, Орце Ѓорѓиевски, иако официјалните резултати се далеку од конечни.
Заврши гласањето, во Скопје гласале 33,82 проценти до 18 часот и 30 минути
Претседателот на Државната изборна комисија (ДИК) Борис Кондарко на прес-конференција информираше дека во 19 часот навремено се затворени сите избирачки места каде денеска се одржа гласањето во вториот круг на локалните избори.
Орце Ѓорѓиевски во водство во Скопје со над 44 илјади гласови
Кандидатот за градоначалник на Град Скопје од ВМРО-ДПМНЕ, Орце Ѓоргиевски, е во водство со освоени 44.991 гласови, што претставува 63,7% од обработените избирачки места, покажуваат податоците од Државната изборна комисија.
Неговиот противкандидат од Левица, Амар Мециновиќ, досега има 22.082 гласови, односно 31,26% од гласовите
ЈО: Вториот круг од локалните избори помина мирно, забележан само еден прекршок во Шуто Оризари
Привремената Комисија на Јавното обвинителство за следење на евентуални кривични дела поврзани со изборниот процес денеска го следеше вториот круг од гласањето на локалните избори.
Гаши: Да гласаме за подобри општини и градови
„Гласот е најважниот демократски инструмент преку кој граѓаните го определуваат правецот на развојот и нивното претставување. Ги охрабрувам сите граѓани да ја искористат оваа можност за да ја изразат својата волја во корист на нашите општини и градови“, напиша Гаши на Фејсбук.
ДУИ ѝ се заблагодари на дијаспората за гласањето
Во име на ДУИ изразуваме благодарност и почит кон секој граѓанин, особено кон дијаспората кои денеска го искористија демократското право на глас со одговорност и достоинство, порача Арбр Адеми
Димитриевски: На Куманово и на Македонија им е потребна слога, соживот, разбирање
Им честитам на сите коишто се пласираа во вториот круг. Верувам дека денеска и Куманово и Македонија ќе победат на еден демократски начин, порача кандидатот за градоначалник на Куманово, Максим Димитриевски.
Касами: Денес зборувате вие со вашиот глас, искористете го овој момент
Кандидатот за градоначалник на Тетово Билал Касами ги повика граѓаните на овој град да излезат да гласаат, за, како што рече реализација на проектитете кои ќе им ги подобрат условите за живот во општината.
Давкова: Сакам да го истакнам господинот Бујар Османи, тој се однесуваше фер и демократски за кампањата
Претседателката Гордана Сиљановска Давкова оцени дека изборната кампања за локалните избори во Македонија во 2025 година, за разлика од некои претходни изборни процеси, била пристојна, со почит и со акцент на програмите и проектите, а не на лични напади.
Ѓорѓиевски: Денес е празник на демократијата
Денес е празник на демократијата, ден кога секој ваш глас има сила да ја одреди иднината на нашиот град, порача кандидатот за градоначалник на град Скопје од ВМРО-ДПМНЕ, Орце Ѓорѓиевски.
Мицкоски: Убеден сум дека ќе се врати она Скопје кое го паметам од мојата младост
Претседателот на ВМРО-ДПМНЕ и премиер Христијан Мицкоски порача дека ова се убедливо најдемократските и најфер избори некогаш организирани во демократска Македонија. Тој им се заблагодари на граѓаните кои гласале во првиот, како и оние кои сега гласаат во вториот круг од локалните избори.
Герасимовски: Очекувам наредниот мандат да го водиме заедно со граѓаните
Очекувам денес да имаме мирен изборен ден и дека секој самостојно ќе може да го даде својот глас, рече кандидатот за градоначалник на општина Центар, Горан Герасимовски.
„Слободен печат“ во Кичево: Ништо од програмата и вредностите, секој гласаше за – „своите“!
Впечатокот на екипата на „Слободен печат“ од обиколката на повеќе гласачки места и во градот, но и во руралните места е дека секој гласа за „своите“. За поддршка на Дехари, според информации од ДУИ и од кичевци, се оперира со бројка дека од албанската дијаспора се дојдени најмалку 10 авиони, 18 автобуси и околу 700 автомобили, или меѓу 4.000 и 5.000 кичевски Албанци. Дури и да се претерани бројките, сепак, во градот и околината беше евидентно дека се дојдени многу гастрбајтери.
Гласал за Биљал Касами, па се пофали на Фејсбук
Пет часа пред да заврши изборниот молк на страницата на Фејсбук „Бусула Политике“ објавено беше гласачко ливче од Тетово, со заокружен кандидатот на „Влен“ Биљал Касами. Ова претставува отворена агитација.
Јакимовски: Граѓаните или ќе изберат личност подготвена за градоначалник или за кратко ќе се покајат
Кандидатот за градоначалник на Општина Карпош Стевчо Јакимовски ги повика граѓаните да излезат да гласаат зашто, како што рече, со гласањето секој граѓанин ќе одлучи каква ќе биде иднината на општината во наредните четири години и каква личност ќе застане на чело на општината.
Тошковски: Стабилноста на државата се гради преку фер избори
Денеска го остварив моето право на глас во рамки на вториот круг од локалните избори во Центар и во Скопје, па како министер за внатрешни работи, цврсто верувам дека стабилноста и безбедноста на државата почнуваат со почитување на демократските процеси и институциите, порача на Фејсбук министерот за внатрешни работи Панче Тошковски.
Ахмети прв гласаше во 7 часот, ги претекна другите политичари
Лидерот на ДУИ, Али Ахмети, утрово излезе прв на гласање пред другите лидери на партии. Тој се појави на избирачкото место во своето родно село Зајас речиси веднаш по отворањето на истото во 7 часот.
Затворени гласачките места
Во 19 часот затворени се избирачките места на кои граѓаните денеска можеа да гласаат на Локалните избори. Право на глас во вториот круг од изборите имаа 1.013.375 граѓани, од кои 474.304 се запишани во избирачкиот список за Град Скопје.
ДИК: До 18:30 излезноста 40,45 проценти
Според податоците од Државната изборна комисија (ДИК), до 18:30 часот излезноста на локалните избори, на ниво на цела држава е 40,97 отсто.
Во првиот круг, до 18:30 часот гласале излезноста била поголема - 46,48 проценти.
Најголема излезност има во Новаци (73.7%), Дојран (72.44%) и Лозово (71,98).
До 17 часот излезноста 39,28 отсто
До 17 часот излезноста е 39,28 проценти, односно гласале 279.241 гласач, соопшти Државната изборна комисија.
Поголема излезеност во Брвеница во вториот круг до 15 часот
Во Општина Брвеница е забележана поголема излезеност во вториот круг од локалните избори. До 15 часот своето право на глас го оствариле 40,83% од избирачите, додека во првиот круг во истиот термин излегле 30,55%.
ГАЛЕРИЈА | Мирен ден, но голема неизвесност во Кичево – излезноста расте од час во час
Изборниот ден во Кичево минува во мирна и демократска атмосфера, без забележани нерегуларности, а граѓаните активно го користат своето право на глас.
До 15 часот излезноста изнесува 40,6 проценти, што е значително повеќе во споредба со првиот круг, кога до истиот термин гласале 36,22 отсто од запишаните избирачи.
Драстично намалена излезност во Чаир и Сарај, слаб интерес за избор на градоначалник на Скопје
Во скопските општини Чаир и Сарај речиси и да нема интерес за денешното гласање за градоначалник на Град Скопје. Според податоците до 15 часот, излезноста е значително пониска во споредба со првиот изборен круг, кога веќе беа избрани градоначалници на овие општини.
Елвис Бајрам и роднини затекнати во изборна агитација, ДИК им ги одзеде акредитациите
Државната изборна комисија денеска во рамки на 151. седница расправаше по два приговори за остварување на право на глас, при што во двата случаи утврди дека лицата се запишани во Избирачкиот список и до 19 часот можат да го остварат своето право и донесе одлука за одземање на акредитациите на осуммина домашни набљудувачи поради постапување спротивно на Изборниот законик и на Кодексот за набљудување.
До 15 часот излезноста 27,19 отсто
До 15 часот, на ниво на цела држава гласале 275.034 гласачи или 27,19 отсто, според податоците од Државната изборна комисија.
Најголема излезност досега има во Крушево (50,22%), Пробиштип (49,04%) и Росоман (48,13%).
До 13 часот излезноста изнесува 19,96 отсто — најмногу гласачи во Пробиштип, најмалку во Сарај и во Чаир
На ниво на цела држава, излезноста до 13 часот изнесува 19,96 отсто, односно 134.124 гласачи, соопшти Државната изборна комисија.
До 11 часот гласале 10,1 отсто од граѓаните — најмал одзив во Сарај, Чаир и во Шуто Оризари
Според најновите податоци на Државната изборна комисија, излезноста до 11 часот изнесува 10,1 отсто на ниво на цела држава, врз основа на обработени 92,94 проценти од избирачките места.
Полицијата воочи 10 прекршувања на изборниот молк: Во Шутка сликале кочан со гласачки ливчиња
Во текот на 1 ноември 2025 година до 7 часот на 2 ноември 2025 година, односно до отворање на избирачките места, регистрирани се 10 пријави за нарушување на изборниот молк од кои по три на подрачје на СВР Скопје и СВР Охрид, две на подрачје на СВР Штип и по една на подрачје на СВР Тетово и СВР Битола. По преземени мерки не се потврдени пријавите за шест настани, соопшти МВР.
До 9 часот гласале 2,88 отсто од граѓаните во земјава — најмногу гласачи во Пробиштип, најмалку во Чаир и Сарај
До 9 часот гласале 22.379 граѓани, што претставува излезност од 2,88 отсто на ниво на цела држава, што е помала од првиот круг во кој беше 3 отсто.
Денеска ќе се бројат вчерашните гласови на болните, немоќните и на затворениците
Државната изборна комисија соопшти дека гласовите на болните и на немоќните, затворениците и штитениците во домовите за стари лица ќе бидат пребројани денес, по завршувањето на гласањето во вториот круг, а резултатите ќе бидат објавени заедно со оние од редовното гласање.
Вториот круг од изборите за градоначалници ќе го следат 1.622 домашни и странски набљудувачи
Вториот круг од локалните избори, во кои треба да се изберат градоначалници во 32 општини и Градот Скопје, ќе го следат вкупно 1 622 акредитирани набљудувачи, од кои 957 се домашни, а 621 меѓународни, соопшти Државната изборна комисија (ДИК).
МВР со дронови ќе го следи и вториот круг од изборите
И во вториот круг од локалните избори Министерството за внатрешни работи со мобилни тимови и со дронови ќе се грижи за безбедноста на избирачките места.
Кандидатите за градоначалник го трчаат вториот круг
Граѓаните на Македонија гласаат за градоначалници во вториот круг на осмите локални избори од осамостојувањето. Право на глас во вториот круг имаат 1.013.375 избирачи кои гласаат на 1.771 избирачко место во 32 општини и во Градот Скопје.
Пријавете кај народниот правобранител ако има изборни повреди — еве го телефонскиот број
Во канцеларијата на Народниoт правобранител денеска од 7 до 19 часот ќе функционира беслатната телефонска линија: 0800-54321, на која што граѓаните ќе можат да пријават каква било повреда на избирачкото право.
Почитуван читателу,
Нашиот пристап до веб содржините е бесплатен, затоа што веруваме во еднаквост при информирањето, без оглед дали некој може да плати или не. Затоа, за да продолжиме со нашата работа, бараме поддршка од нашата заедница на читатели со финансиско поддржување на Слободен печат. Станете член на Слободен печат за да ги помогнете капацитетите кои ќе ни овозможат долгорочна и квалитетна испорака на информации и ЗАЕДНО да обезбедиме слободен и независен глас кој ќе биде СЕКОГАШ НА СТРАНАТА НА НАРОДОТ.ПОДДРЖЕТЕ ГО СЛОБОДЕН ПЕЧАТ.СО ПОЧЕТНА СУМА ОД 100 ДЕНАРИ
Видео на денот