Кандидатот за градоначалник на општина Карпош од ВМРО-ДПМНЕ, Сотир Лукроски, на својот Фејсбук профил прогласи победа во вториот круг од локалните избори. Според резултатите од Државната изборна комисија, Лукроски, кандидат на коалицијата „Твоја Македонија“ предводена од ВМРО-ДПМНЕ, освои 47,52% од гласовите (12.468), додека неговиот противкандидат Стевчо Јакимовски од коалицијата „Искуство за успех“ освои 42,64% (11.188 гласа).

-Драги мои карпошани, вечерва зборувам со срце полно гордост и благодарност. Не се борев за функција, туку за доверба. Денес не победувам јас, победува Карпош – напиша Лукроски.

Во своето обраќање тој најави ново време на „ред, визија и работа“, дигитализација на општината, реконструкција на фасадите и лифтовите, повеќе зелени површини и нови паркинг места.

-Ова не е победа на една партија, ова е победа на сите луѓе што сакаат промени. Вечерва не славиме крај, туку нов почеток — почеток на Карпош што повторно дише со народот – порача Лукроски.