Бангладеш им нареди на имиграциските власти повторно да ја вметнат ознаката „освен за Израел“ во пасошите на своите жители, поништувајќи ја промената што во 2020 година беше направена за време на владата на експремиерката Шеик Хасина, пренесува Бизнис стандард.

„Овој пасош важи за сите земји во светот, освен за Израел“,  ќе стои како натпис, под наредба на Министерството за внатрешни работи.

Бангладеш не го признава Израел и никогаш немал дипломатски односи со него.

Министерството соопшти дека одлуката е донесена во согласност со надворешната политика на земјата, јавното мислење и долгогодишната поддршка на Бангладеш за палестинската кауза.

Со истата наредба, властите добија насока во електронските пасоши да бидат додадени водени жигови во чест на клучните личности загинати за време на востанието во јули и август 2024 година, кое, според властите, инспирирало илјадници луѓе да ја соборат 15-годишната власт на Шеик Хасина.

Според Обединетите нации, во востанието загинале околу 1.400 луѓе, а илјадници биле повредени. Хасина живее во егзил во Индија од 5 август 2024 година.

Наредбата предвидува и измени на фотографиите и водените жигови во електронските пасоши, при што ќе бидат отстранети дел од елементите поврзани со основачот на Бангладеш, Шеик Муџибур Рахман.