Епидемија на ебола во Африка, починаа најмалку 930 луѓе
Епидемијата на ебола во Конго одзеде најмалку 930 животи, со 2.344 потврдени случаи до саботата. Само во последните 24 часа се регистрирани 37 нови смртни случаи, што е највисока дневна бројка од почетокот на епидемијата, објави денеска Министерството за здравство на земјата, пренесува АП.
Препорачано
Епидемијата, која беше прогласена во источниот дел на Конго на 15 мај, е најбрзо растечката епидемија на ебола досега. Таа е предизвикана од вирусот „бундибугио“, редок сој за кој не постои одобрена вакцина или специфичен третман.
Наглото зголемување на бројот на жртви доаѓа во време кога безбедносните проблеми ја попречуваат работата на тимовите на терен во најтешко погодената покраина Итури. Властите пријавија најмалку 12 напади врз здравствени установи и медицински тимови од средината на мај.
Во исто време, многу здравствени работници престанаа да работат во знак на протест поради неисплатени плати. Најмалку 36 здравствени работници досега починале од болеста.
Министерството за здравство соопшти дека 724 пациенти во моментов се во изолација и во болница. Министерството соопшти дека ги засилува напорите во погодените здравствени зони за да се спречи ширењето на болеста.
