Портпаролот на Кремљ, Дмитриј Песков, изјави дека обидот на Европската Унија да преговара со Русија од позиција на сила е ќорсокак и најголема грешка. Москва вели дека ваквите обиди засновани на притисок се фундаментално погрешни, но во исто време тврди дека остануваат отворени за дијалог со Европа. Песков на редовниот брифинг во Москва  зборуваше за украинските напади и перспективите за обновување на односите со ЕУ, објавува „Киев пост“.

Песков рече дека европските лидери грешат ако веруваат дека можат да преговараат врз основа на она што го сметаат за слабост на Москва.

„Европејците длабоко грешат ако претпоставуваат дека со Русија треба да се преговара од позиција на сила. Тоа е нивната најголема грешка, без разлика дали станува збор за некомпетентност, дезинформација или чиста глупост“, рече Песков.

И покрај критиките, Песков нагласи дека Москва останува отворена за преговори.

„Ние не го инициравме прекинот на контактите и нивното намалување на нула“, објасни тој.

Тој повика на „здрав разум“ и меѓусебно признавање на реалноста на теренот. Тој повтори дека претседателот Владимир Путин постојано ја потврдувал подготвеноста на Москва за дијалог, но без ултиматуми и „морализирање“ на Европската Унија.

Путин досега ги отфрли или исмејуваше сите предлози за мировни преговори. Меѓу нив беше отвореното писмо од претседателот Володимир Зеленски во кое се бараше средба, како и предлогот за средба на самитот на Г7 во Франција, за што Кремљ тврди дека никогаш не добил официјална покана.

Коментарите на Песков доаѓаат во време на пораст на нападите со беспилотни летала врз Москва. Руските власти соопштија дека пресретнале 194 беспилотни летала.

„Режимот во Киев продолжува по овој пат и не е усогласен со преговорите“, рече Песков.

Тој додаде дека се преземаат соодветни мерки како одговор на нападите.

ВИДЕО | Украина ја нападна Московската Област со стотици дронови — избувнаа пожари, има повредени