Претседателката Гордана Сиљановска Давкова денеска во вилата „Билјана“ во Охрид ја прими во проштална посета амбасадорката на Хеленската Република во Скопје, Софија Филипиду.

На средбата било разговарано за македонско-грчките односи, регионалната соработка и европската перспектива на земјата. Сиљановска Давкова нагласила дека соработката меѓу земјите од регионот е од особено значење, особено за помалите држави, и изразила очекување Грција да биде меѓу најсилните поддржувачи на македонските евроинтеграции.

-Со влезот на земјата, но и на целиот регион во Европската Унија, ќе се затвори постојниот геостратешки јаз, што ќе придонесе за поголема трговија, инвестиции, како и за подобра енергетска поврзаност во Југоисточна Европа- истакнала претседателката.

Таа оценила дека на односите меѓу Македонија и Грција им е потребен нов импулс за нивно продлабочување и проширување во повеќе области.

Сиљановска Давкова ја истакнала и улогата на културата како значаен мост меѓу двете земји, посочувајќи дека заедничката изведба на „Кармина Бурана“ од македонската, грчката и бугарската филхармонија, како и претставата „Митот за Амазонките“ на фестивалот „Охридско лето“, се примери за успешна културна соработка.