Диносаурусите стануваат нова инвестиција на милијардерите
Рекордната продажба на скелетот на тираносаурус „Гас“ за 50,1 милиони долари на аукциската куќа „Сотби“ во Њујорк повторно го привлече вниманието кон пазарот кој привлекува сè повеќе милијардери, колекционери на инвестиции и фондови во последниве години – трговијата со фосили од диносауруси.
Препорачано
Според „Блумберг“, сè поголем број богати колекционери повеќе не ги гледаат фосилите само како престижни музејски експонати, туку и како алтернативна инвестиција, заедно со уметнички дела, ретки часовници, класични автомобили и скапи вина. Купувачите сметаат дека нивната исклучителна реткост и ограничена понуда ќе продолжат да ја зголемуваат вредноста.
Блумберг наведува дека скелетите на диносаурусите претставуваат необична комбинација од гламур и „примитивна привлечност“ за богатите, што дополнително го стимулира интересот за овој вид колекционерски предмет.
Најнов доказ за овој тренд е продажбата на тираносаурусот „Гас“, стар околу 67 милиони години. По десетминутен процес на лицитирање, анонимен телефонски понудувач плати 50,1 милиони долари, поставувајќи нов светски рекорд за најскапиот фосил некогаш продаден на аукција.
Скелетот на „Гас“ е долг околу 11,5 метри и висок речиси четири метри, и содржи 183 фосилизирани коски, или околу 61 процент од оригиналниот скелет, што го прави меѓу најголемите и најдобро зачуваните примероци на Тираносаурус рекс што се појавиле на пазарот.
Фосилот е откриен на приватен ранч во американската држава Јужна Дакота, а ископувањата траеле од 2021 до 2023 година.
Продажбата го сруши рекордот поставен минатата година, кога скелетот на стегосаурусот „Апекс“ беше продаден за 44,6 милиони долари.
Претходниот рекорд за тираносаурус го држеше познатиот „Стен“, кој беше продаден за речиси 32 милиони долари во 2020 година.
Сепак, растечката цена на фосилите предизвикува загриженост и во научната заедница. Палеонтолозите предупредуваат дека сè поголем број исклучително вредни примероци завршуваат во приватни колекции, каде што стануваат недостапни за научниците и јавноста.
Затоа Здружението на палеонтолози на ‘рбетници го повика новиот сопственик на „Гас“ да обезбеди научен пристап и јавно прикажување на овој примерок.
