Со доаѓањето на потоплите денови, климатизацијата во автомобилите станува речиси неопходна. Сепак, експертите предупредуваат дека една функција што многу возачи често ја користат може да предизвика проблеми доколку остане вклучена предолго.

Истражување објавено во списанието „Наука за животната средина и истражување на загадувањето“ (Environmental Science and Pollution Research) покажува дека користењето на внатрешната циркулација на воздухот може да доведе до зголемување на концентрацијата на јаглерод диоксид во кабината, поради што се препорачува периодично внесување свеж воздух, особено при подолги патувања и кога во возилото има повеќе патници, пренесува „Ревија Хак“.

Лекарката Кристабел Акинола предупредила дека едно мало копче во автомобилот може да создаде опасна ситуација доколку возачите не внимаваат.

„Во вашиот автомобил постои копче што може да ве доведе во опасност за само неколку часа ако го притиснете“, навела таа во објава на социјалните мрежи.

Станува збор за копчето за внатрешна циркулација на воздухот. Оваа функција го користи воздухот што веќе се наоѓа во кабината, наместо да внесува свеж воздух однадвор. Таа му помага на климатизерот побрзо да го разлади возилото, ја намалува потрошувачката на енергија, а може и да спречи навлегување издувни гасови од надворешната средина.

Проблемот се појавува кога оваа функција останува вклучена подолго време.

Акинола раскажала пример со петчлено семејство кое за малку ќе го загубело животот поради токму оваа функција. Тие го подготвиле автомобилот за патување, но не забележале дека едно од децата си играло со контролите на климатизацијата и случајно ја вклучило внатрешната циркулација пред да тргнат.

„За време на возењето, таткото забележал дека сите останати стануваат поспани. Набрзо потоа и тој ја изгубил свеста и излетал од патот во канал. Сè се случило затоа што детето го притиснало тоа копче“, објаснила лекарката.

Кога воздухот постојано се врти во затворената кабина, јаглерод диоксидот што го издишуваат патниците почнува да се наталожува. Истовремено, нивото на кислород се намалува, се појавува замор, а реакциите на возачот стануваат побавни. Ризикот е уште поголем доколку во автомобилот има повеќе луѓе.

Знаците на зголемено ниво на јаглерод диоксид можат да се појават постепено и незабележливо. Според истражувањето, оваа функција не би требало да се користи подолго од 20 минути, бидејќи концентрацијата на јаглерод диоксид во возилото може брзо да се зголеми.

Многу современи автомобили денес имаат автоматски системи кои го следат квалитетот на воздухот и сами ја регулираат циркулацијата. Сепак, вниманието на возачите и понатаму е важно.

Ако забележите дека прозорците почнуваат да се замаглуваат или одеднаш чувствувате необјаснив замор, проверете дали е вклучено вистинското копче.

Понекогаш токму мала ознака на контролната табла може да направи голема разлика.

Климатизерот во автомобилот нема да лади како што треба ако ги правите овие грешки