„Фолксваген голф“ и дизелските мотори со децении беа речиси неразделен дел од автомобилската историја. Сепак, една од најпознатите верзии на овој модел сега заминува во минатото на еден голем европски пазар.

Поради исклучително слабата побарувачка од купувачите, „Фолксваген“ донел одлука целосно да ги исфрли дизелските верзии на „голф“ од продажната понуда во Велика Британија, пренесува „Феликс магазин“.

Од компанијата официјално потврдиле дека британските купувачи повеќе нема да можат да нарачуваат нов „голф“ со дизелски мотор. Оние кои и понатаму сакаат да го купат овој модел со дизелски погон ќе можат да изберат само од возилата што веќе се произведени и моментално се наоѓаат на залиха кај овластените продавачи.

Половина век историја заминува во минатото

Оваа одлука означува прекин на традиција што започна уште во 1976 година, со првата генерација на „голф“.

Тогаш под хаубата се наоѓал атмосферски дизелски мотор со зафатнина од 1,5 литри и моќност од само 50 коњски сили. Подоцна моторот бил унапреден на 1,6 литри и 54 коњски сили.

Со појавата на турбополначот се родил легендарниот голф ГТД со 70 коњски сили, а во следните генерации низ децениите се менувале познатите СДИ и ТДИ мотори, кои стекнале статус на автомобилска икона низ Европа, особено на просторите каде дизелските возила долго време биле исклучително популарни.

Во актуелната осма генерација на „голф“, купувачите можеа да изберат добро познат дволитарски ТДИ мотор со 116 или 150 коњски сили. Но, на британскиот пазар таа приказна сега завршува.

Британците сè помалку избираат дизел

Одлуката за повлекување на дизелските верзии е директна последица на драматичниот пад на интересот кај купувачите.

Податоците на Европското здружение на производители на автомобили покажуваат колку се промениле навиките на британските возачи. Во првите пет месеци од 2026 година, во Велика Британија биле продадени само 16.943 автомобили со дизелски мотор, и тоа кога се земаат предвид сите автомобилски брендови заедно.

Ако оваа бројка се спореди со вкупниот број продадени возила на британскиот пазар во истиот период – околу 925.000 автомобили – станува јасно дека дизелските модели веќе имаат многу мала улога.

Поради тоа, „Фолксваген“ на британскиот пазар ќе се насочи кон бензинските мотори и сè попопуларните хибридни погонски системи.

Дали истото ќе се случи и во останатиот дел од Европа?

Иако одлуката во Велика Британија претставува голем пресврт, љубителите на дизелските мотори во другите европски земји засега немаат причина за загриженост.

Од седиштето на Фолксваген во Волфсбург наведуваат дека дизелските верзии на Голф и понатаму ќе останат достапни на останатите европски пазари каде што постои доволна побарувачка.

Моделот „голф“ со ТДИ погон продолжува да се произведува, а испораките ќе продолжат таму каде што продажбата на дизелските верзии сè уште има економска оправданост.

Сепак, одлуката за Велика Британија е уште еден показател дека ерата на дизелските автомобили постепено се приближува кон својот крај.

Пред да купите половен автомобил проверете дали го има овој мотор под хаубата