Легендата за „неуништливите“ јапонски мотори одамна е една од главните причини за популарноста на половните автомобили. Но, искуствата од сервисите и сопствениците покажуваат дека дел од моторите можат да имаат сериозни и скапи проблеми, особено ако не се одржуваат правилно или имаат познати фабрички слабости, пишува „Аутоимобили“.

Подолу се издвоени мотори на автомобили за кои често се пријавуваат дефекти во пракса, според сервисни информации и кориснички искуства.

Бензински мотори

1. Нисан 1.2 TCe DIG-T (HR12DDT)

Овој мал турбо мотор се вградува во повеќе модели, меѓу кои Нисан Кашкаи, Џук и Пулсар. Кај дел од примероците е забележана зголемена потрошувачка на масло, која може да достигне и до 1 литар на 1.000 километри, најчесто поради проблеми со клипните прстени и мешање на масло со гориво.

Дополнително, при работа со ниско ниво на масло може да дојде до проблеми со затегнувачот на ланецот, како и до зголемено таложење на наслаги што влијае врз турбополначот и катализаторот.

Во некои европски држави имало и колективни тужби поврзани со овој мотор, а сервисите често пријавуваат целосни блокади кај возила што долго време работеле со недоволно масло.

Трошоци за поправка:
Ремонт на мотор (клипни прстени, ланец, турбо) околу 46.500–93.000 денари.
Целосна замена со користен мотор 93.000–155.000 денари.

2. Тојота 1.8 VVT-i (1ZZ-FE) i 2.4 VVT-i (2AZ-FE)

Овие мотори се вградуваат во модели како Корола, Авенсис, РАВ4 и Камри. Кај одредени серии е забележана значителна потрошувачка на масло, понекогаш и до 1 литар на 500–1.000 километри.

Причината најчесто се поврзува со конструкцијата на клипните прстени и малите отвори за одвод на масло. Со текот на времето доаѓа до наслаги на јаглерод, што може да предизвика детонации, намалена компресија и сериозни дефекти.

Кај моторот 2.4 2АЗ-ФЕ постојат и технички сервисни билтени, а во некои случаи биле развиени и модифицирани комплети клипови.

Трошоци за поправка:
Ремонт 46.500–77.500 денари.
Замена со користен мотор 77.500–124.000 денари.

3. Мазда 1.3 Renesis Wankel (RX-8)

Ротациониот мотор е познат по специфичната конструкција и бара високо ниво на одржување. Главен проблем се абењето на врвовите на роторите, што доведува до пад на компресијата и висока потрошувачка на масло.

Возилата со овој мотор бараат внимателно загревање и правилно гасење, бидејќи неправилна употреба може да предизвика тешкотии при стартување и дополнителни оштетувања.

Трошоци за поправка:
Генерален ремонт 155.000–248.000 денари.
Замена со конвенционален мотор 248.000–372.000 денари.

4. Мазда Л-серија бензинци (1.8 / 2.0 / 2.3 / 2.5)

Овие мотори се користат во повеќе модели како Мазда 3, Мазда 6 и Мазда 5. Кај дел од возилата се појавува таложење на наслаги во системот за масло, што може да доведе до зголемена потрошувачка на масло и намалена ефикасност.

Проблемот е почест кај возила што се користат претежно во градски услови и на кратки релации.

Трошоци за поправка:
Чистење и привремено решавање 6.200–12.400 денари.
Ремонт 46.500–77.500 денари.
Замена 46.500–93.000 денари.

Дизел мотори

5. Тојота 2.0 D-4D (1AD-FTV) i 2.2 D-CAT (2AD-FTV)

Кај овие мотори се пријавуваат проблеми со ерозија на блокот кај заптивката на главата на моторот. Поради термички оптоварувања може да дојде до деформации, мешање на масло и антифриз и прегревање.

Оваа појава е забележана кај одредени серии и се смета за конструкциски чувствителна област.

Трошоци за поправка:
108.500–155.000 денари, а со дополнителни делови може да надмине 217.000–310.000 денари.

6. Субару 2.0 боксер дизел (ЕЕ20)

Боксер дизел моторот е познат по специфичната конструкција, но и по високи трошоци за одржување. Кај дел од возилата се јавуваат проблеми со лежишта, замаец со двојна маса и системот за издувни гасови.

Поради сложеноста, поправките често се ограничени и скапи.

Трошоци за поправка:
155.000–217.000 денари за замена на краток блок
93.000–155.000 денари за делумни поправки

7. Мазда 2.0 / 2.2 MZR-CD (RF/R2AA)

Кај овие дизел мотори се забележани проблеми со дихтување на инјектори, што може да доведе до наслаги во системот за масло. Дополнително, ланецот на развод може да се истегне и предвреме да предизвика дефекти.

Проблеми се јавуваат и со ДПФ системот, особено при градска возење.

Трошоци за поправка:
93.000–155.000 денари
Ланец 37.000–62.000 денари
Мотор 93.000–155.000 денари

8. Нисан 2.2 / 2.5 YD (YD22/YD25)

Овие дизел мотори се познати по проблеми со системот за вбризгување, турбополначот и инјекторите. Кај дел од примероците може да дојде до оштетување на клиповите поради неправилно согорување.

Трошоци за поправка:
Инјектори 62.000–108.500 денари
Ремонт 93.000–155.000 денари
Користен мотор 108.500–186.000 денари

9. Исузу 3.0 V6 DMAX (4JX1)

Овој мотор е познат по комплексен систем за вбризгување и подмачкување. Кај одредени случаи се јавува мешање на течности, што може да предизвика сериозни оштетувања на моторот.

Поправките често се економски неисплатливи.

Трошоци за поправка:
Над 310.000 денари, често над вредноста на возилото.

10. Мицубиши 2.5 DI-D (4D56)

Стар дизел мотор кој низ годините добивал повеќе засилувања. Кај дел од примероците се јавуваат проблеми со прегревање, пукнатини на блокот и оштетувања на клиповите при поголемо оптоварување.

Трошоци за поправка:
Замена со користен мотор 93.000–139.500 денари

Златни правила при купување

Ако сепак се одлучите да ризикувате, еве неколку проверени совети:

– Побарајте сервисна историја – доказ дека маслото е менувано најмногу на секои 10.000 километри.

– Избегнувајте возила со „сомнителна“ историја – автомобил увезен од странство со 140.000 километри на бројачот, а без ниту една сметка или доказ за сервисирање, речиси сигурно има вратена километража.

– Земете примерок од маслото и течноста за ладење – бела емулзија на капачето од маслото е знак за тревога.

– Проверете ја компресијата – пред купување задолжително измерете го притисокот во сите цилиндри.

– Истражете добро – пред да ги дадете парите, внесете го називот на моделот и најчестите проблеми на интернет и погледнете барем неколку видеа од автомеханичари и сервисери.

– Земете ги предвид и другите трошоци – големиот сервис, кој кај некои мотори е неизбежен по купувањето, чини од **15.500 до 46.500 денари**, во зависност од моделот и потребните интервенции.

Кој е најдобар автомобил за возач почетник?