Австралиската сојузна држава Нов Јужен Велс би можела да стане првата во светот која ќе воведе официјална дозволена граница на ТХЦ (психоактивната состојка во канабисот) за возачи при сообраќајни контроли.

Предлог-законот носи значајни промени за лицата кои користат медицински канабис, со што би им се овозможило да управуваат со возило дури и ако во организмот имаат одредено ниво на ТХЦ. Возачите кои користат медицински канабис, а кои се позитивни на мала количина од неговата активна состојка, ќе избегнат обвиненија за возење под дејство на дрога, пренесува австралиски „Еј-би-си“.

Медицинскиот канабис е легален, но правилата досега беа строги

Медицинскиот канабис е легален во Австралија од 2016 година, но досега возачите со лекарски рецепт се соочуваа со исти санкции како и лицата кои користат канабис рекреативно, без разлика на терапевтската употреба.

Дозволена граница до 50 нанограми ТХЦ

Според новиот предлог, лицата кои користат медицински канабис ќе можат да возат доколку во плунката имаат до 50 нанограми ТХЦ по милилитар.

Доколку возачот биде позитивен при рутинска контрола, ќе му биде изречена забрана за возење од 24 часа, по што ќе следува дополнителна лабораториска анализа.

Ако резултатите покажат дека нивото на ТХЦ е под дозволената граница, возачот повторно ќе може законски да управува со возило.

Казни дури по трето прекршување

Интересно е што надминувањето на дозволената граница нема веднаш да резултира со парична казна или одземање на возачката дозвола. Системот предвидува две предупредувања, а дури по третото прекршување следуваат построги санкции. Возачите кои трипати ќе бидат затекнати со повисоко ниво на ТХЦ би можеле да добијат казна од околу 704 австралиски долари (околу 440 евра) и суспензија на возачката дозвола од најмалку три месеци.

Прва ваква законска граница во светот

Стручњаците оценуваат дека оваа промена би можела да претставува пресвртница во регулирањето на возењето под влијание на канабис. Професор од Центарот за истражување на сообраќајни несреќи при Универзитетот Монаш оцени дека реформата претставува важен чекор кон балансирање на сообраќајната безбедност и потребите на пациентите кои користат медицински канабис. Тој посочи дека промената е споредлива со воведувањето дозволена граница на алкохол во крвта и дека може да помогне во одржување на безбедноста на патиштата.

Не сите се согласуваат со предлогот

Сепак, предлогот не доби едногласна поддршка. Опозициската лидерка во Нов Јужен Велс, Кели Слоун, изјави дека не го поддржува овој закон, нагласувајќи дека ефектот на ТХЦ се разликува од личност до личност и дека сè уште нема доволно јасни научни докази за вакви фиксни граници.

Можен глобален преседан

Доколку Нов Јужен Велс го усвои овој закон, би можел да постави преседан кој ќе влијае и на други земји во светот во начинот на регулирање на возењето под влијание на канабис.