Дел од работата на сообраќајната полиција, со цел следење на спроведувањето на законите на патиштата, треба да го преземат сообраќајните камери со помош на вештачка интелигенција. Но, практиката покажува дека тоа не оди толку лесно како што се очекува.

Помал број полицајци на патиштата, побрза обработка на прекршоците и автоматско издавање казни требаше да ја зголемат ефикасноста на системот со сообраќајни камери и вештачка интелигенција. Сепак, пилот-проектот во Грција покажа дека технологијата сè уште има сериозни ограничувања, пишува грчкиот медиум „Та Неа“.

Според грчките медиуми, камерите со вештачка интелигенција поставени во подрачјето на Атина во текот на април и мај регистрирале околу 13.000 сообраќајни прекршоци. Човечки оператори успеале да прегледаат 5.500 од нив, а од тој број само 400 пријави биле оценети како валидни. Дури 5.100 случаи биле отфрлени.

Одите во Грција на одмор? Новите сообраќајни казни ќе ве „изгорат“ доколку не внимавате

Најголем дел од отфрлените пријави се однесувале на пречекорување на брзината. Вкупно 3.800 казни биле поништени затоа што се засновале на пресметка на просечна брзина меѓу две точки, а за таков начин на казнување во Грција моментално не постои законска рамка.

Вистинските проблеми се појавиле при препознавањето на користење мобилен телефон додека се вози и сигурносен појас. Полициските службеници што ги прегледувале снимките утврдиле дека вештачката интелигенција често погрешно го толкувала она што го гледа. Темни предмети во рацете на возачите биле препознаени како мобилни телефони, а како прекршоци биле означувани и сосема вообичаени дејства, како менување брзини или користење електронска цигара.

Дополнителни тешкотии создавала и осветленоста и сенките. Како што наведува грчкиот весник „Та Неа“, камерите во одредени случаи пријавувале непостоечки патници на совозачкото седиште поради наводно неносење сигурносен појас, па казни пристигнувале дури и за празни седишта. Имало и ситуации во кои возачи биле погрешно означени како лица без сигурносен појас, бидејќи темната облека се спојувала со бојата на појасот.

Проблем претставува и недостигот на контекст. Камерите со вештачка интелигенција го регистрираат секое возило што влегува во автобуска или брза лента, но не можат да ја проценат причината за таквиот потег. Возач кој се поместува за да пропушти возило на брза помош за системот изгледа исто како и оној што свесно го прекршува правилото. Истото важи и за ситуации кога сообраќајот го регулира полициски службеник.

Сето наведено се базира на информации што протекле во медиумите, а не на официјални полициски извештаи. Грчкото Министерство за инфраструктура и сообраќај го претставува проектот како успешен.

За викендов се најавени гужви накај Халкидики — ќе се вози низ Солун, се работи на обиколницата

Според податоците објавени од државната телевизија „ЕРТ“, помеѓу крајот на март и крајот на мај биле потврдени 2.453 дигитални казни. Возачите поднеле 420 официјални приговори, а прифатени биле само 52, најчесто во случаи на медицински итни ситуации.

Владата го истакнува малиот број прифатени жалби како доказ за сигурноста на системот. Сепак, притоа се премолчува дека полициските службеници и понатаму мора рачно да прегледуваат илјадници потенцијални прекршоци пред казните да бидат испратени до возачите.

Интересно е и тоа што на подрачјето на Атина моментално работат само осум камери со вештачка интелигенција, кои истовремено ја следат брзината, поминувањето на црвено светло, користењето мобилен телефон, сигурносниот појас и заштитната кацига. Тоа го потврдил Кимон Логотетис од Министерството за инфраструктура и сообраќај во разговор за јутјуб-каналот на Василис Сарабалидас.

Плановите за поставување на дури 1.000 нови камери со вештачка интелигенција засега се стопирани по жалби на учесници во тендерот. Паралелно се спроведува посебен проект за поставување на 388 класични камери што ќе служат исклучиво за надзор на поминување на црвено светло.

„Безбеден град“ и во Атина