Словенија синоќа ја зафати силно невреме кое донесе стихијни бури, град, силен ветер и обилни врнежи, објави „Н1“.

Најголема штета е забележана во регионот Горенска, но последици од невремето се пријавуваат и од други делови на земјата. Многу граѓани сè уште се без електрична енергија.

Голема штета претрпе и населбата Кланец кај Коменда. Мештанинoт Алојзиј Франц за „Н1 Словенија“ изјави дека бурата започнала со силен дожд, по што следеле град и силен ветер.

„Ми урна пет смреки, однесе дел од покривот, ги скрши прозорците, а сè уште немам струја. Само од дневната соба изнесов четири кофи град. Влезе низ скршените прозорци“, рече Франц.

Додаде дека слично силно невреме ја погодило Кланец и пред 30 години.

Во Камник најголем дел од штетата веќе е саниран

Градоначалникот на Камник, Матеј Слапар, изјави дека силниот ветер и обилните врнежи предизвикале бројни проблеми низ општината. Најпогодени се Шмарца и Тухинската долина, покрај Дуплица и центарот на градот.

Поплавени се и два училишни објекти – Основното училиште „Марија Вере“ и „Цириус Камник“.

Вработените во текот на ноќта ја санирале штетата, па наставата денес се одвива нормално.

„Најлошото траеше околу 15 минути“

Претседателот на противпожарниот сојуз на Церкље, Марјан Лусковец, рече дека најмногу настрадале јужниот и југоисточниот дел од општината.

„Ветерот откорнуваше покриви и носеше кровни конструкции. Проценуваме дека се погодени повеќе од 30 локации“, рече тој.

Според него, најголемата штета настанала за само околу петнаесет минути, околу 20:30 часот. Ветерот бил толку силен што уривал ѕидови, кршел прозорци и врати и предизвикал огромна штета во земјоделството.

Во Церкље наврна град и до половина метар висина

Градоначалникот на општина Церкље на Горенјскем, Франц Чебуљ, рече дека најтешко е погоден долниот дел на Залог, каде речиси и да нема објект без оштетување.

„Пченка, компир, житарици, зелка и зеленчук се целосно уништени. На тоа подрачје оваа година ништо нема да порасне“, рече Чебуљ.

Најсилниот појас на бурата бил широк меѓу 300 и 400 метри, а на некои места за неколку минути паднал толку град што наносите достигнувале и половина метар. Оштетени се повеќе од 30 објекти, а погодени околу 20 семејства.

Над 150 тешко оштетени објекти

Директорот на словенечката Управа за заштита и спасување, Леон Бехин, изјави дека во невремето тешко се оштетени повеќе од 150 објекти, од кои над 100 само во општина Коменда.

Сахарска прашина и каллив дожд ќе ја гушат Грција

На терен се ангажирани повеќе од 165 противпожарни екипи во над 50 општини. Во тек е санација на објектите, отстранување на паднати дрвја, воспоставување на сообраќај и отстранување на дефекти во електромрежата.

Свлечиште ја затвори железничката пруга

Бурата предизвика проблеми и во железничкиот сообраќај. Свлечиште ја затвори пругата Дравоград–Вузеница, па е организиран автобуски превоз наместо возови.

Привремено беа затворени и други делници поради паднати дрвја и прекин на електрична енергија.

Огромна штета во земјоделството на истокот од земјата

На истокот на Словенија градот предизвика голема штета на посевите и земјоделските површини, особено во подрачјето на Мајшперк, Жетале и на Халоци. На некои места патиштата се затворени поради паднати дрвја и свлечишта.

Стотици домаќинства без струја

Според податоците на компанијата „Електро Целје“, утрово без електрична енергија биле 669 корисници, најмногу во подрачјата Војник и Ползела.

Според досегашните информации, нема податоци за потешко повредени луѓе, но се проценува дека материјалната штета е многу голема.

По бурата во акција и дронови: брзо ја проценија штетата, пронајдоа и побегнати коњи

По силното невреме, на терен е ангажирана и државната единица за брзи интервенции, која ја прегледува околината со дронови.

Водачот на тимот за управување со дронови, Боштјан Видмар, објасни како ги означуваат оштетените објекти и кои се главните предности на беспилотните летала. Благодарение на дрон, брзо успеале да пронајдат и два изгубени коња.

ВИДЕО | Серија земјотреси во Грција, свлечишта затрупаа патишта