Во близина на островчето Блитвеница, југозападно од островот Жирје во Шибеничкиот архипелаг беше забележан перкаст кит.

Драшко Холцер, виш кустос во Хрватскиот музеј за природна историја и биолог специјализиран за екологија и заштита на големи морски ‘рбетници, истакнува дека овој вид е редовен посетител на Јадранот во ова време од годината, пишува „Морски.хр“.

Тоа е сезонски гостин кој влегува во Јадранското Море во потрага по храна во пролетните и летните месеци, првенствено поради цветањето на планктонот и изобилството на мали морски ракови во областите на јужниот Јадран и Јабучкиот басен.

Бидејќи овие морски џинови престојуваат во длабоките и отворените делови од морето, ретко ги гледаат обичните граѓани, додека се многу почеста глетка за рибарите на отворено море.

Инаку, перкастиот кит (Balaenoptera physalus) во просек е дол околу 20 метри, иако е регистриран примерок од 27 метри и тежат околу 70 тони.

Препознатлив е по својата сиво-кафеава горна и бела долна страна, како и по својата специфична, асиметрично обоена долна вилица, чија десна страна е бела, а левата страна темна.

Перкастиот кит ги населува сите светски океани, мигрирајќи помеѓу постудените поларни региони во лето и потоплите тропски мориња во зима.

На морското дно пронајдена гробница на китови стара пет милиони години