Вознемиреност кај родителите предизвика случајот во клонот „Калинка“ во селото Брајковци, каде што кај шест деца во текот на денот се појавиле симптоми на повраќање.

Од ЈОУДГ „Калинка“ соопштија дека веднаш по појавата на симптомите биле известени родителите и биле преземени сите мерки согласно протоколите, а децата добиле навремена медицинска грижа.

Случајот веднаш бил пријавен до надлежните институции, по што инспекциските служби извршиле вонреден надзор и земале примероци за лабораториски анализи. Засега нема официјално потврдена причина за појавата на симптомите.

Во соопштението се наведува и дека едно од децата кај кое се појавиле симптоми воопшто не било присутно во градинката тој ден, а слични симптоми биле пријавени и кај повеќе членови на семејствата, што исто така ќе биде предмет на испитување.

Од градинката апелираат до јавноста да не се шират непроверени информации и да се почекаат официјалните резултати од анализите, кои се очекуваат во наредните денови.

Според информациите од установата, сите деца се во добра здравствена состојба.

Шест деца од градинката „Калинка“ во Брајковци вчера ручале макарони со месо, па завршиле во болница на инфузија