Министерот за надворешни работи и надворешна трговија Тимчо Муцунски денеска преку објава на Фејсбук информираше дека во рамки на работната посета на Вашингтон остварил средба со заменик-државниот секретар на Соединетите Американски Држави, Кристофер Ландау.

Муцунски посочи дека Северна Македонија и САД имаат блиски и усогласени ставови за низа политички, економски и безбедносни прашања. На средбата, како што наведува, била потврдена заедничката определба за дополнително зајакнување на стратешкото партнерство и унапредување на билатералната соработка во интерес на граѓаните на двете земји.

Во фокусот на разговорите биле конкретни области од заемен интерес, меѓу кои одбраната и сојузништвото во рамки на НАТО, економската соработка, енергетиката и регионалната поврзаност.

-Разменивме мислења и за состојбите во регионот, како и за значењето на континуираниот ангажман на САД за зачувување на мирот, безбедноста и просперитетот на Западен Балкан- наведува Муцунски во објавата.