Со бројни посетители од повеќе градови во земјава и гости од странство, во празнична атмосфера со музика, пиво и традиционална скара, во Прилеп започна 23-тото издание на Пивофест. Организаторите најавуваат тридневна забава исполнета со настапи на познати музички имиња од Македонија и Балканот.

Фестивалот беше официјално отворен синоќа, а прилепскиот градоначалник Дејан Проданоски им посака на посетителите настанот да го паметат по добрата атмосфера, храната, пијалаците и позитивните емоции што ги носи фестивалот.

-Означуваме старт на 23-тото издание на Фестивалот на пивото во Прилеп. Имаме гости од повеќе страни и се надевам дека и во следните фестивалски денови ќе има посетители од странство. Најважно е сите да понесат убави спомени од Прилеп – добра забава, добра храна и пријатна атмосфера- изјави Проданоски.

Дел од музичката програма е и настапот на Огнен Здравковски, кој оваа година се најде на фестивалската сцена, откако претходно како средношколец го посетувал Пивофест како гостин.

-Со воз доаѓавме да бидеме дел од атмосферата на Пивофест, а сега имам можност како музичар да настапам пред публиката. Благодарен сум и им посакувам успех на сите- рече Здравковски.

На отворањето присуствуваше и премиерот Христијан Мицкоски. Посетителите во следните фестивалски вечери ги очекува богата музичка програма со настапи на повеќе македонски и балкански изведувачи. Организаторите очекуваат илјадници гости до завршувањето на манифестацијата во недела.