Привремената Комисија на Јавното обвинителство за следење на евентуални кривични дела поврзани со изборниот процес денеска го следеше вториот круг од гласањето на локалните избори. Во сите јавни обвинителства беа организирани вонредни дежурства со цел навремена координација и давање насоки за постапување на надлежните органи.

-Изборниот ден помина без поголеми нарушувања на изборниот процес. Единствено е регистрирано едно известување на подрачјето на Шуто Оризари за фотографирање на гласачко ливче, за што веднаш се дадени насоки за документирање на настанот, кој претставува прекршок – се вели во соопштението.

Комисијата на Јавното обвинителство најави дека останува активна до целосно завршување на изборниот процес. Од таму потсетуваат дека сите граѓани кои имаат сомнеж за можни кривични дела поврзани со изборите можат да поднесат пријава во било кое јавно обвинителство во државата или преку електронска пошта на [email protected]..

Јавните обвинителства, по сите пријави поврзани со изборите постапуваат со приоритет.