Со факели, музика и со патриотски песни, вечерва пред главниот штаб на ВМРО-ДПМНЕ во Скопје пристигна кандидатот за градоначалник на Град Скопје, Орце Ѓорѓиевски. Неговото пристигнување беше пречекано со громогласен аплауз и скандирања од симпатизерите и поддржувачите на партијата, кои веќе неколку часа се собираат пред штабот за да ја прослават изборната победа, која е сѐ поизвесна.

Пред штабот е поставена голема бина, а атмосферата е налик на вистински митинг со музика, знамиња и пеење. Присутните го поздравија Ѓорѓиевски со извици на поддршка и со македонски знамиња во рацете.

Според организаторите, прославата ќе трае до доцните часови, а на бината се очекува да се обратат неколку високи функционери на ВМРО-ДПМНЕ. Полициски екипи се присутни во околината за да го одржат јавниот ред и мир, но засега атмосферата е мирна и весела.